بىلىكتىلىگىن ارتتىرعىسى كەلەتىن دارىگەر ەندى بىلىمىمەن قاتار تاجىريبەسىن دە دالەلدەۋى ءتيىس
ءبىرىنشى جانە ەكىنشى ساناتتى يەلەنۋ ءۇشىن انافيلاكتيكالىق ەسەڭگىرەۋ كەزىندە جەدەل جاردەم كورسەتۋدەگى ماشىعىن كورسەتۋ كەرەك بولادى.
اسقىنعان جۇرەك قان تامىرى سيندرومى كەزىندە كومەك كورسەتۋ، جۇرەك كەنەت توقتاپ قالعان كەزدە كومەك كورسەتۋ، بازالىق جۇرەك - وكپە جان ساقتاۋ شارالارى، جوعارى تىنىس الۋ جولدارىنا (كونيكوتوميا) بوتەن زات تۇرىپ قالعان كەزدە كومەك كورسەتۋ.
تەراپيەۆت، حيرۋرگ، اكۋشەر- گينەكولوگ، ستوماتولوگ جانە وزگە بەيىندى دارىگەرلەرگە جوعارى سانات الۋ ءۇشىن: كلينيكالىق تاپسىرمانى (كلينيكالىق جاعداي) قولدانا وتىرىپ، زەرتحانالىق جانە اسپاپتىق كورسەتكىشتەردى (رەنتگەن- سۋرەت، ە ك گ، ۋدز، زەرتحانالىق ساراپتامالار) تالداۋ.
وتكىر جۇرەك قان تامىرى سيندرومى كەزىندە كومەك كورسەتۋ ارنايى وقىتىلعان جانە بەرىلگەن تاپسىرماعا سايكەس كلينيكالىق جاعدايدى كورسەتەتىن «ستاندارتتى پاتسيەنتتىڭ» قاتىسۋىمەن وتكىزىلەدى.
ەسكە سالا كەتەيىك، ق ر دەنساۋلىق ساقتاۋ جانە الەۋمەتتىك دامۋ مينيسترلىگى 2015-جىلى مەنەدجەرلەر مەن دەنساۋلىق ساقتاۋ ۇيىمداستىرۋشىلارىنان وزگە دارىگەرلەر ءۇشىن ءبىلىمى مەن تاجىريبەلىك ماشىعىن باعالاۋ شاراسىن ەنگىزۋ جۇمىستارىن جالعاستىرادى.
2014-جىلدىڭ ەكىنشى جارتى جىلدىعىندا وتكىزىلگەن باعالاۋ ناتيجەلەرى بويىنشا بىلىكتىلىك ساناتىن كورسەتۋگە ۇمىتكەر دارىگەرلەر ءۇشىن ەمتيحان ماتەريالدارى قايتا قارالىپ، جەتىلدىرىلدى.
جوعارى، ءبىرىنشى جانە ەكىنشى ساناتتان ۇمىتكەردى باعالاۋ تاۋەلسىز ساراپشىلار، جوعارى ساناتتى، عىلىمي اتاعى بار، ارنايى وقۋدان وتكەن دارىگەرلەردىڭ قاتىسۋىمەن وتكىزىلدى.
وتكەن جىلدىڭ 4- توقسانىندا 2079 دارىگەر باعالاۋدان ءوتىپ، ولاردىڭ 1653 ءى (%79) ەمتيحاندى ءساتتى تاپسىردى. 2015-جىلعى 1- توقساندا سىناقتان وتكەن 1916 دارىگەردىڭ 1423 ءى (%74) ەمتيحاننان سۇرىنبەي ءوتتى.
دارىگەرلەردىڭ تاجىريبەلىك ماشىعىن باعالاۋ رەسپۋبليكا حالقىنا كورسەتىلەتىن مەديتسينالىق كومەكتىڭ ساپاسىن ارتتىرۋعا مۇمكىندىك بەرەدى.
