قازاقستان تاۋەلسىزدىكتىڭ العاشقى جىلدارى ساۋد ارابياسىنىڭ كورسەتكەن قولداۋىن ۇمىتپايدى - ق ر پرەزيدەنتى

استانا. قازاقپارات - ساۋد ارابياسى كورولدىگىمەن اۋىل شارۋاشىلىعى كەشەنىندە، مۇناي-حيميا، ەنەرگەتيكا سالالارىنداعى ءىس-قيمىلدى ارتتىرۋدا ورتاق مۇددە بار. بۇگىن اقوردادا قازاقستانداعى ءبىرقاتار ەلدەردىڭ ەلشىلەرىنەن سەنىم گراموتالارىن قابىلداۋ كەزىندە ەلباسى نۇرسۇلتان نازاربايەۆ وسىلاي ءمالىم ەتتى.

«اراب جانە مۇسىلمان الەمىندەگى ءبىزدىڭ نەگىزگى سەرىكتەستەردىڭ ءبىرى - ساۋد ارابياسى كورولدىگى. كورولدىك حالقى مەن باسشىلىعى قازاقستان تاۋەلسىزدىگىنىڭ باستاپقى كەزەڭدەرىندە زور قولداۋ كورسەتتى. ءبىز ونى ەشقاشان ۇمىتپايمىز جانە جوعارى باعالايمىز. ەلدەرىمىز اراسىنداعى ساياسي ديالوگ سەنىمگە قۇرىلعان. ساۋدا جانە ەكونوميكا سالاسىندا ءوزارا ءىس-قيمىل اياسىن كەڭەيتۋگە بەرىك نەگىز قالاندى»، - دەدى پرەزيدەنت.

مەملەكەت باسشىسى ينۆەستيتسيا، عىلىم تەحنولوگياسىن الماسۋ سالاسىنداعى ىنتىماقتاستىعى ءۇشىن قۇقىقتىق نەگىز جانە تيىستى جاعداي جاسالعانىن، ساۋد ارابياسى كورولدىگىمەن اۋىل شارۋاشىلىعى كەشەنىندە، مۇناي-حيميا، ەنەرگەتيكا، تۋريزم، كولىك سالالارىنداعى ىقپالداستىقتى ارتتىرۋعا ورتاق مۇددەلىلىكتىڭ بار ەكەنىن اتاپ ءوتتى.

اۆتور: رۋسلان عابباسوۆ