قازاقستاندىق ستۋدەنتتەر ەۋروپا تورىندە ناۋرىز مەيرامىن اتاپ ءوتتى

استانا. قازاقپارات - «قازاق دالاسىنىڭ اڭىزدارى» دەگەن اتاۋمەن ۇلى بريتانيانىڭ جەتەكشى وقۋ ورىندارىنىڭ بىرىندە ستۋدەنتتەر بالى ءوتتى.

مەرەكە قازاق حاندىعىنىڭ 550 جىلدىعىنا وراي ۇيىمداستىرىلدى.

شاراعا جينالعان حالىقتىڭ قاراسى كوپ. ناۋرىز مەيرامى قارساڭىندا ستۋدەنتتىك بال وتكىزۋ -  ۆورۆيك ۋنيۆەرسيتەتىندە ءداستۇرلى شارا. وتكەن جىلعى ناتيجەلەر بويىنشا اتالعان وقۋ ورنى ۇزدىك دەپ تانىلدى.

بۇگىنگى مەرەكەلىك شارا جاستاردىڭ شوتلاند ءۆالسىن بيلەۋىمەن باستالدى. بال -  ەۋروپالىق جانە ەۋرازيالىق سالت- ءداستۇر، مادەنيەت پەن ونەردىڭ ۇشتاساتىن جەرى.

سوندىقتان بۇل مەرەكەگە دايىندىق بىرنەشە ايعا سوزىلدى. ستۋدەنتتەر بيدەگى ءار قادامىن قايتالاپ، قازاقتىڭ تاريحىنا قاتىستى سۇراق- جاۋاپ ويىندارىن دايىندادى. ۋنيۆەرسيتەت ستۋدەنتى ءارى حورەوگراف ەركەناز ءارىنوۆا شوتلاند جانە يرلاند بيلەرىن تاڭداۋ ارقىلى بريتانياداعى حالىقتىڭ بىرلىگىن كورسەتكىمىز كەلدى دەيدى.

ال شارادا شىرقالعان تانىمال قازاق كۇيلەرى مەن حالىق بيلەرى وتانعا دەگەن ىستىق ىقىلاس پەن ۇلتتىق مادەنيەتتى دارىپتەۋ بولىپ تابىلادى.

بولات ناسىعازى، Warwick ۋنيۆەرسيتەتىنىڭ ستۋدەنتى:

- ءبىزدىڭ بال ءوز تاريحىڭ مەن مادەنيەتىڭدى دارىپتەۋگە مۇمكىندىك بەرەدى. وسىلايشا باي مۇرامىزدى بريتاندىقتارعا ماقتانىشپەن تانىستىرامىز. ونىڭ ۇستىنە قازاق حاندىعىنىڭ 550 جىلدىعى دا وسىنداي شارالاردى ۇيىمداستىرۋعا جاقسى سەبەپ.

جۇزدەن جۇيرىك شىققان قازاق ستۋدەنتتەرىن قازاقستاننىڭ بريتانياداعى ەلشىلىگى، «بولاشاق» حالىقارالىق باعدارلامالار ورتالىعىنىڭ مۇشەلەرى مەن ورتالىق ازيا تۋرالى بريتاندىق جۋرنال وكىلدەرى ماراپاتتادى.  ۇلىبريتانياداعى قازاقستان ستۋدەنتتەرىنىڭ قاۋىمداستىعى مەن بريتاندىق فۋتبول تۋرنيرىندە جەڭىسكە جەتكەن «نيۋكاسل» ۋنيۆەرسيتەتىنىڭ كومانداسى باس جۇلدەنى ولجالادى.

بەلسەندى جاستار قايىرىمدىلىق شارالارىن وتكىزىپ، قازاق ەلىندەگى بالالار ۇيىنە قارجىلاي كومەك كورسەتكەن. بالدىڭ سوڭى حانشايىم مەن حانزادانى تاڭداۋمەن قورىتىندىلاندى. جىگىتتىڭ سۇلتانى دەپ بولات ناسىعازى تانىلسا، قىزدار اراسىندا ايگەرىم بالكەنوۆا كوپشىلىكتىڭ كوزايىمىنا اينالدى.

www.24.kz