شىعىس قازاقستاندا قۇتىرعان قاسقىر تالاعان ازامات اۋرۋحانادا قايتىس بولدى

None
None
استانا. قازاقپارات - شىعىس قازاقستان وبلىسى اياگوز اۋدانى مىڭبۇلاق اۋىلىندا وسىدان ءبىراز بۇرىن قاسقىرمەن ايقاسىپ، سونىڭ سالدارىنان اۋرۋحاناعا تۇسكەن ازامات - امانحان ءامىروۆ قايتىس بولدى.

بۇل تۋرالى egemen.kz ءتىلشىسى حابارلادى.

بۇعان دەيىن اتالعان ەلدى مەكەنگە ءبىر توپ قاسقىر كىرىپ كەتكەنىن، دالا تاعىلارىنىڭ اۋىل تۇرعىندارىنا شابۋىل جاساعانىن («ارلانمەن الىسقان امانحان»، «ەگەمەن قازاقستان»، 16 - قاڭتار، 2015 -جىل) جازعان بولاتىنبىز.

ەسكە سالا كەتەيىك، بەيبىت كۇننىڭ باتىرى كەلىنشەگىنە تونگەن قاۋىپتى دەر ۋاقىتىندا بايقاپ، كوكجالمەن جالاڭ قولمەن ارپالىسىپ باققان-دى. ول ايەلى اس ۇيدەن اكەلىپ بەرگەن پىشاقتى كوك ءبورىنىڭ كەۋدەسىنە بويلاتا سۇعىپ، كەلىنشەگىن دە، ءوزىن دە اجالدان اراشالاپ، ەرلىك كورسەتكەن ەدى. سودان كەيىن اۋداندىق اۋرۋحانادا جاتقىزىلعان ا. ءامىروۆتى وبلىس ورتالىعىنا ەمدەۋگە اۋىستىرعان بولاتىن. دارىگەرلەر ونى قۇتىرعان قاسقىر قاپقانىن، جاعدايى اۋىر ەكەنىن جەتكىزگەن.

وكىنىشكە قاراي، وسكەمەندەگى №1-قالالىق اۋرۋحانانىڭ جۇقپالى اۋرۋلار بولىمىندە ەم قابىلداعان امانحان ءامىروۆ توتەننەن كەلگەن جاراقاتىنان جازىلا الماي، 9 - ناۋرىزدا قايتىس بولعانى بەلگىلى بولىپ وتىر. اۋرۋحانا قىزمەتكەرلەرىنىڭ ايتۋىنشا، ناۋقاس ينفەكتسيالىق بولىمگە تۇسكەن ساتتەن باستاپ ءدارى- دارمەكتىڭ كۇشىمەن عانا جاتقان.

دۋمان اناش.

دەرەك: egemen.kz.

سوڭعى جاڭالىقتار