امەريكالىقتار قىز الىپ قاشۋ ءداستۇرى تۋرالى فيلم تۇسىرەدى

استانا. قازاقپارات - جاقىندا قازاقستاندىق پروكاتقا شىققان «سۆادبا نا ترويح» ءفيلمى كوپشىلىك كوڭىلىنەن شىقتى.

كورەرمەندەر ونىڭ حالىق مەنتاليتەتىنە ساي تۇسىرىلگەنىنە ريزا بولىپ، ەكىنشى ءبولىمىن اسىعا كۇتىپ وتىر. وسىعان وراي، فيلم تۋرالى تولىق اقپاراتتى پروديۋسەرى بايان ەرىمبەتتەن الۋدى ءجون كوردىك.

- كورەرمەندەر كوزايىمىنا اينالعان فيلمنىڭ يدەياسى قالاي تۋدى؟

- ونىڭ سيۋجەتىن ءوزىم ويلاستىردىم. ياعني، يدەيا وزىمە تيەسىلى. ونى امەريكادا پروديۋسەرلىك سالادا وقىپ جۇرگەن كەزدەن باستاپ ويلاستىرا باستادىم دەسەم دە بولادى. جەر بەتىندە قانشا حالىق بولسا دا، بارلىعىنا ورتاق ءبىر سەزىم بار. ول - وتى ماڭگىلىك لاۋلاپ جاناتىن ماحاببات سەزىمى. قازاقستاندىقتارعا ماحاببات تۋرالى تىڭ حيكايا ۇسىنۋدى ءجون كوردىم.

- فيلم سيۋجەتى قىز الىپ قاشۋ داستۇرىمەن بايلانىستى. وسى داستۇرگە دەگەن كوزقاراسىڭىز قانداي؟

- قىزدىڭ كەلەسىمىنسىز الىپ قاشۋ ءجيى بولىپ جاتادى. ال مەن بۇل ءداستۇردى تەك ەكى جاقتىڭ كەلىسىمى بولعاندا نەمەسە بۇل رومانتيكالىق وقيعانىڭ ءبىر بولىگى بولعان جاعدايدا عانا قولدايمىن. ءومىر ادام بالاسىنا ءبىر- اق رەت بەرىلەدى. وسى ءومىرىن اركىم سۇيىكتىسىمەن عانا وتكىزۋى كەرەك. ءبىزدىڭ فيلمدە سيۋجەت وسى ءداستۇردىڭ نەگىزىندە ءوربيدى. اۆتورى ءوزىمىز بولعاندىقتان، انانىڭ ماپەلەپ وسىرگەن قىزىنا زورلىق- زومبىلىق كورسەتكىمىز كەلمەدى. مۇندايعا تولىقتاي قارسىمىز. ونى جابايى ارەكەت دەپ باعالار ەدىم.

- سوندا فيلم ارقىلى زورلىق- زومبىلىققا قارسى ەكەنىڭىزدى بىلدىرگىڭىز كەلدى مە؟

- بۇل - كومەديا جانرىندا تۇسىرىلگەن فيلم. وندا الىپ قاشۋ تەك قىزدىڭ كەلىسىمىمەن بولادى. ول باسقا جىگىتكە اتاستىرىلىپ، سۇيىكتىسىنە قوسىلا الماعاندىقتان، وسى داستۇرگە جۇگىنۋگە ءماجبۇر بولادى.

- اكتەرلەردى قالاي تاڭدادىڭىزدار؟

- بىزگە اكتەرلەردى ارت- ديرەكتور ۇسىندى. ولاردى شەتىنەن شاقىرىپ، كاستينگ جاريالادىق. باستى ءرول بۇعان دەيىن كۆن ويىندارىندا بوي كورسەتىپ جۇرگەن داۋرەن ايدارقۇلوۆقا بۇيىردى. بۇل ونىڭ العاشقى ءرولى بولسا دا، ءوزىن اكتەر رەتىندە جاقسى قىرىنان تانىتتى. جارىم اسقار ونىڭ ەرەكشە تالانتىن مويىندايتىندىقتان، شاقىرعان ەكەن. ارت- ديرەكتورىمىز ۇسىنعان ارۋجان جازىلبەكوۆا دا كاستينگتەن ءساتتى ءوتتى. ءوز رولىنە ابدەن لايىق بولدى. ال نۇرتاستىڭ قابىلەتىن ءوزىم دە بۇعان بەس دەگەن باعاعا باعالايتىنمىن.

- باستى كەيىپكەر ءاليا اتا- ەنەسىنىڭ ۇيىندە دجينسى شالبار، قىسقا كويلەك كيىپ جۇرەدى. ونىڭ بۇنداي كيىمى سىنعا ۇشىرايدى دەپ قورىقپادىڭىز با؟

- ونى تىم قىسقا كيىمدەر كيدى دەپ ايتا المايمىن. كويلەگىنىڭ ۇزىندىعى تىزەسىنە دەيىن جەتىپ تۇردى. ونىڭ ۇستىنە ءوزى دە اقىلى كوركىنە ساي سىمباتتى قىز. ەشبىر ءمىنى جوق. بويىنان قازاقى بيازىلىقتى كورەمىز. ارۋجاننىڭ وزىنە جاراساتىنداي كويلەكتەر تاڭدالدى. مۇمكىندىگىنشە رومانتيكالىق ستيلدە كيىندىرۋگە تىرىستىق. ول ءۇشىن ارنايى ماماندار جالدادىق.

- وسى كۇنگە دەيىن فيلمدى قانشا ادام كورىپ ۇلگەردى؟

- مەن ناقتى سانىن ايتا المايمىن. قاي كينوتەاتر بولماسىن زالدىڭ كورەرمەنگە لىق تولى بولعانىن بىلەمىن. مۇنىمەن قاتار، ەكىنشى اپتادان باستاپ سەانستاردىڭ سانى ارتتى. Kino.kz سايتىنان ونىڭ قانشالىقتى كوپ كورسەتىلگەنىن انىقتاۋعا بولادى. الماتىدا بارلىعى ويداعىداي ءوتىپ جاتىر. سەانستار سانىنىڭ كوبەيۋى سۇرانىس بار ەكەنىن بىلدىرەدى. ياعني، حالىقتىڭ كوڭىلىنەن شىقتى.

- فيلمدى ءتۇسىرۋ ءۇشىن جالپى قانشا قاراجات جۇمسادىڭىزدار؟

-  350000 ا ق ش دوللارى جۇمسالدى.

- ءتۇسىرىلىم قانشا ۋاقىتقا سوزىلدى؟

- بارلىعىن ەسكەرسەك، شامامەن ءبىر جىلدان ارتىق ۋاقىت كەتتى. بۇل ۋاقىتتا ءبىز سەناريىن ويلاستىردىق، ءتۇسىرىلىم ءوتتى، اكتەرلەرگە كاستينگ جاريالادىق، مونتاجى مەن حالىققا تانىستىرىلۋى بار دەگەندەي.

- فيلمدى قاي جەرلەردە تۇسىردىڭىزدەر؟

- الماتى قالاسىندا، قاپشاعايدا تۇسىردىك.

- فيلم ساۋندترەكتەرىنە توقتالىپ وتسەڭىز. ونى ارنايى جازدىردىڭىزدار ما؟

- ءيا. ەكى ساۋندترەك بار. ءبىرى - قازاق تىلىندە، ەكىنشىسى - ورىس تىلىندە. كومپوزيتور نۇرلان قاراجىگىتوۆ جازعان ولەڭدى قانات سىبانوۆ ورىندايدى، ال قازاق تىلىندەگى نۇسقاسى «وردا» توبىنا تيەسىلى. ولەڭ «الىپ كەت» دەپ اتالادى. ەكى ولەڭگە دە بەينەبايان تۇسىردىك. ولاردى عالامتور بەتتەرىنەن تاماشالاي الاسىزدار.

- فيلمدى شەتەلدە كورسەتكىلەرىڭىز كەلە مە؟

- بىزگە امەريكا كومانيالارىنىڭ بىرىنەن ۇسىنىس ءتۇستى. ولار بۇل فيلمنىڭ تاعى ءبىر نۇسقاسىن ءتۇسىرىپ كورگىلەرى كەلەدى. ءبىز ءتىپتى ترەيلەرىن دە دايىنداپ قويدىق. ونى عالامتورعا بۇگىن جاريالايمىن. فيلم قىز الىپ قاشۋدان باستالادى. رولدەردى امەريكالىق اكتەرلەر سومدايدى. حالىققا ۇنايدى دەگەن نيەتتەمىز.

- سۇحباتىڭىزعا كوپ راقمەت! سىزدەرگە شىعارماشىلىق تابىس تىلەي وتىرىپ، فيلمنىڭ ەكىنشى ءبولىمىن اسىعا كۇتەتىنىمىزدى جەتكىزگىمىز كەلەدى!

  massaget.kz