مۇقاعالي ماقاتايەۆتىڭ قاي كەزەڭدە ءومىر سۇرگەنىن بىلمەيتىن ۇمىتكەر سىننان ءسۇرىندى - پرەزيدەنت سايلاۋى

استانا. قازاقپارات - ق ر پرەزيدەنتتىگىنە ۇمىتكەردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا الدىندا پرەزيدەنتتىككە ءوزىن- ءوزى ۇسىنعان باقتيار ەستەمەسوۆ سىناق تاپسىرىپ، ودان وتە المادى.

بۇل تۋرالى بۇگىن اتالعان كوميسسيانىڭ ءتوراعاسى مىرزاتاي جولداسبەكوۆ ءمالىم ەتتى.

«ب. ەستەمەسوۆ جازبا جۇمىسىنا «نۇرلى اقىل، ىستىق قايرات» تاقىرىبىندا شىعارما جازدى. وكىنىشتىسى، تاقىرىپ اشىلماعان. «نۇرلى اقىل، ىستىق قايرات» دەگەن ۇعىمداردىڭ ءمان- ماعىناسىن اۆتور تولىق تۇسىنبەگەن. جۇمىس وتە ساۋاتسىز جازىلعان.

بارلىق قاتەلەردىڭ سانى ەلۋ. ەملە قاتەلەرىنىڭ سانى 27، تىنىس بەلگىلەرىنەن جىبەرىلگەن قاتە - 19، ستيلدىك قاتە - 4 ەۋ»، - دەدى كوميسسيا ءتوراعاسى.

ونىڭ اتاپ وتۋىنشە، ءماتىن وقۋ سىناعىندا كانديدات مۇقاعالي ماقاتايەۆتىڭ ولەڭدەرىن وقىعان. «اتتەڭ، ولەڭدى وقي المادى. مەن «مۇقاعالي ماقاتايەۆ قاي كەزدە ءومىر سۇرگەن»، دەپ سۇراق قويدىم، كانديداتىمىز «XIX عاسىردا ءومىر سۇرگەن»، دەدى. بۇل كىسى كىتاپ وقىماعانىن مويىندادى. تاريح پەن ادەبيەتتى دە وقىماعان ەكەن. ەكىنشى تاپسىرماعا دا قاناعاتتانبادىق»، - دەدى م. جولداسبەكوۆ.

ۇمىتكەردىڭ ءۇشىنشى تاپسىرمادا «ءتىل تاعدىرى - ەل تاعدىرى» دەگەن تاقىرىپتا سويلەگەنىن ايتقان م. جولداسبەكوۆ: «بۇل تاقىرىپتىڭ دا ءمان- ماعىناسىن اشا المادى. «قازاق ەلىنىڭ تاعدىرى مەن ءتىل تاعدىرى بۇرىننان قالىپتاسىپ كەلەدى، جان- جاقتان كەلىپ، ءتىل بىلسەك دەگەن ازاماتتار كوپ»، دەگەن ەكى اۋىز ءسوز ايتتى. ونىڭ ۇستىنە، ب. ەستەمەسوۆتىڭ ءوز قولىمەن جازعان ءومىربايانىندا 10 قاتە ءجۇر. باقتيار وكسىكباي ۇلى ەستەمەسوۆ قازاق ءتىلىن ەركىن مەڭگەرمەگەن دەگەن قورىتىندىعا كەلىپ وتىرمىز»، - دەدى كوميسسيا ءتوراعاسى.

اۆتور: مارلان جيەمباي