يسلام مادەنيەتى شاقىرادى

None
None
استانا. قازاقپارات - وڭتۇستىك استاناداعى قازاقستان رەسپۋبليكاسىنىڭ مەملەكەتتىك ورتالىق مۋزەيىندە 18 - ناۋرىزدان باستاپ، «يسلام مادەنيەتىنىڭ قۇندىلىقتارى» اتتى كورمە اشىلماق. كورمە «الماتى - يسلام مادەنيەتىنىڭ 2015 - جىلعى استاناسى» اتتى مەملەكەتتىك مادەني شارانىڭ اياسىندا وتەدى.

مىڭداعان جىلدار بويى قۇرانمەن بىرگە ەنگەن يسلام ءدىنى مەن اراب ءتىلىنىڭ اسەرى كوپتەگەن ۇلىستارمەن قاتار قازاق حالقىنىڭ دا ءدىني، ساياسي، مادەني تىلدىك جانە الەۋمەتتىك قارىم- قاتىناستارىنا زور ىقپال ەتكەندىگى تاريحتان ءمالىم.

وسىنداي جادىگەرلەر ورتالىق مۋزەيدە ساقتالىپ كەلسە، ەندى ونى كوپشىلىك كورۋگە دە مۇمكىندىك جاسالىپ وتىر. يسلام مادەنيەتىنە قاتىستى قۇندىلىقتاردىڭ دەنى اراب، پارسى، تۇرىك، شاعاتاي، تاتار، وزبەك، قازاق تىلدەرىندەگى سيرەك كەزدەسەتىن قولجازبالار مەن بىرەگەي باسىلىمدار بولسا، كورمە تورىنە قۇران كىتاپتارى مەن ءدىني مازمۇندى ءارتۇرلى ليتوگرافيالىق باسپا كىتاپتار، قولجازبالار قويىلادى.

كورمەگە جازبا ەسكەرتكىشتەرىمەن قاتار، ورتا ازيا مەن قازاقستان اۋماعىندا ورتاعاسىرلاردا بيلىك قۇرعان اۋلەتتەر مەن حاندىقتاردىڭ كۇمىس، مىس مونەتالارى دا قويىلماق. سونداي-اق قۇران سۇرەلەرى مەن اياتتارىنىڭ تاسقا قاشالعان جازۋلارى، يسلام جەرلەۋ سالتىندا كۇنى بۇگىنگە دەيىن قولدانىلىپ كەلە جاتقان تاس بەلگىلەرى دە بار.

قازاقى ءداستۇرلى ورتادا كەڭىنەن قولدانىلعان، كەستەلەنگەن جاينامازدار، تاسپيقتار، لاۋىقتار، وقۋ قۇرالى رەتىندە پايدالانىلعان جىلقىنىڭ جاۋىرىن سۇيەگىنە جازىلعان ءالىپبي، الۋان ءتۇرلى ءدىني مازمۇندى ماتىندەرمەن ورنەكتەلگەن اعاش قالىپتار، ىدىس- اياقتار سياقتى بۇيىمداردى دا تاماشالاۋعا بولادى.

سونىمەن قاتار كورمەدە تاقىرىپتىڭ مازمۇنىن اشا تۇسەتىن ءتۇپنۇسقا فوتوسۋرەتتەر، قوسىمشا يلليۋستراتسيالار، مىسىر، اراب رەسپۋبليكاسى مەن يران يسلام رەسپۋبليكاسى مادەني ورتالىقتارىنىڭ مۇسىلمان قۇسنيحاتىمەن كوركەمدەلگەن جادىگەرلەرى كورسەتىلەدى. كورمە ورتالىق مۋزەيدىڭ 4 زالداعى ورتالىق الاڭدا ۇيىمداستىرىلسا، ول شىلدە ايىنا دەيىن جالعاسادى.

اقەركە جەكسەمباي قىزى

«ايقىن»

سوڭعى جاڭالىقتار