پرەزيدەنتتىككە كانديدات ۋ. قايساروۆ: ت م د تاۋەلسىز مەملەكەتتەر دوستاستىعىنىڭ قازاقشاسى ما سوندا؟
لينگۆيستيكالىق كوميسسيا ءوز شەشىمىن شىعارعاننان كەيىن ۋ. قايساروۆقا سۇراق قويۋ مۇمكىندىگى بەرىلدى. «سىزدەر ت م د دەپ ايتىپ وتىرسىزدار. ءبىراق، ت م د دەگەن ءسوز سۇراقتا بولعان دا جوق، ايتىلعان دا جوق. سول ت م د- نى قايدان الدىڭىز»، - دەدى كانديدات ۋ. قايساروۆ كوميسسيا ءتوراعاسى مىرزاتاي جولداسبەكوۆكە.
«مەن ونى ويلاپ تاپقانىم جوق. بۇل بۇرىنعى كەڭەس وداعىنىڭ قۇرامىندا بولعان مەملەكەتتەردىڭ 1991 - جىلعى جەلتوقساندا الماتىدا قۇرعان دوستاستىعى. سودان كەيىن ءبىزدىڭ تاۋەلسىزدىگىمىز باستالدى. سىزگە بەرىلگەن تاقىرىپ «تاۋەلسىز مەملەكەتتەر دوستاستىعى: تاريحى مەن بۇگىنى»، - دەدى م. جولداسبەكوۆ.
«ءيا»، - دەدى ۋ. قايساروۆ. - ءبىراق ت م د قاي جەردە؟ ت م د تاۋەلسىز مەملەكەتتەر دوستاستىعىنىڭ قازاقشاسى ما سوندا؟».
«تاۋەلسىز مەملەكەتتەر دوستاستىعى دەگەنىمىز، وسى سوزدەردىڭ باس ارىپتەرىن الساڭىز ت م د بولادى»، - دەدى تاعى ءبىر مارتە تۇسىندىرگەن كوميسسيا ءتوراعاسى.
كانديدات سوندا كوميسسيا مۇشەسىنىڭ مۇنداي دايەكتەرگە كەلىسپەيتىندىگىن ايتتى. «ول تۇسىنىكتى عوي. ءبىراق تاۋەلسىز مەملەكەتتەر دوستاستىعى دەگەنىمىز، قازاقستاننىڭ باسقا تاۋەلسىز مەملەكەتتەرمەن دوستاستىعى. مىسالى، رەسەي دە، وزبەكستان دا، قىرعىزستان دا تاۋەلسىز عوي»، - دەدى كانديدات.
«ءسىز تاقىرىپتى تۇسىنبەگەنسىز، اڭگىمە باسقادا. ءسىز قازاقستاننىڭ دوس مەملەكەتتەرى دەپ قىتايدى، امەريكانى اتادىڭىز، دۇرىس. شۇكىر، قازاقستان بارلىق مەملەكەتتەرمەن جاۋ ەمەس، دوس. ءبىراق، مىنا تاقىرىپ انىق، ال ول اشىلماعان، ءسىز ول جايىندا جازباعانسىز»، - دەدى م. جولداسبەكوۆ.
اۆتور: مارلان جيەمباي
