انا ءتىلىن بىلمەگەن ۋ. قايساروۆ ەل باسقارعىسى كەلەدى - لينگۆيستيكالىق كوميسسيا قورىتىندىسى
«ءۋاليحان ءابىش ۇلى سىناق بارىسىندا «تاۋەلسىز مەملەكەتتەردىڭ دوستاستىعى: تاريحى مەن بۇگىنى» اتتى تاقىرىپتا شىعارما جازدى.
مەنىڭ تاڭقالىپ وتىرعانىم، ءۋاليحان ءابىش ۇلى تاقىرىپتى تۇسىنبەدى. ول ءوز شىعارماسىندا رەسەيگە بوداندىق، قازاقستاننىڭ قىتايمەن تاتۋ قارىم- قاتىناسىمىز تۋرالى جازعان. ۇمىتكەر شىعارمادا 23 قاتە جىبەردى. اتاپ ايتساق، تىنىس بەلگىسىنەن 11، ەمىلەدەن 5، ستيليستيكالىق 7 قاتە كەزدەستى. ەلىمىزدىڭ پرەزيدەنتى ەڭ ساۋاتتى ادام بولۋى ءتيىس»، - دەدى م. جولداسبەكوۆ.
«ءسىز ەكىنشى كەزەڭدە ءى. ەسەنبەرليننىڭ «الماس قىلىشىن» وقىدىڭىز. ءبىراق مەن ءبىر سۇراق قويىپ ەدىم، ءسىز ءوزىڭىز وقىعان ماتىندە نە ايتىلعانىن تۇسىنبەدىڭىز. ءماتىن ىشىندە جازۋشى قولدانعان ءبىرقاتار قازاقتىڭ بايىرعى ادەمى سوزدەرى بار. جىلىشىراي، تارتۋ- تارالعى، قىرعي- قاباق، سويىلىن سوعۋ دەگەن سياقتى سوزدەردى سۇراپ ەدىم ماعىناسىن ءتۇسىندىرىپ ايتا المادىڭىز»، - دەپ جالعادى ءسوزىن كوميسسيا ءتوراعاسى.
ونىڭ اتاپ وتۋىنشە، كانديدات ءۇشىنشى كەزەڭدە ءوزى اينالىسىپ جۇرگەن كەنەسارى حان توڭىرەگىندە ءسوز قوزعاۋى ءتيىس بولعان. ءبىراق ول تاشەنوۆ جايىندا، جەلتوقسان وقيعاسى تۋرالى جانە قىزمەت ەتىپ جۇرگەن كەزىندەگى قيىندىقتار جايىندا اڭگىمە ايتقان.
«ءبىراق، ءبىزدىڭ كوميسسيا مۇشەلەرىنىڭ تاڭ قالعانى، ءوزىڭىز قولىڭىزبەن ورتالىق سايلاۋ كوميسسياسىنا جازعان وتىنىشىڭىزدە باسقا مەملەكەتتىڭ ازاماتتىعىندا تۇرمىن دەپ جازىپسىز. بۇگىن و س ك بۇل تۋرالى مالىمدەمە جاسادى. ءوزىڭىزدىڭ قولىڭىزبەن جازىلعان ءومىرباياندىق دەرەكتە وتە دورەكى قاتەلىكتەر جىبەرگەنسىز. قازاقستان رەسپۋبليكاسىنىڭ اۋماعىندا «تۇعاننان تۇرامىن» دەپ جاۋاپ بەرەسىز. سوڭىندا تولتىرعان كۇنىڭىزدى جازىپسىز. ناۋرىز سوزىنە «ناۋىرىز» دەپ قاتە جازاسىز. كوميسسيانىڭ قورىتىندىسى قايساروۆ ءۋاليحان ءابىش ۇلى زاڭ تالاپ ەتىپ وتىرعانداي قازاق ءتىلىن جان- جاقتى ەركىن مەڭگەرمەگەن»، - دەدى م. جولداسبەكوۆ.
اۆتور: مارلان جيەمباي
