پرەزيدەنتتىككە كانديدات ۋ. قايساروۆ «تاۋەلسىز مەملەكەتتەر دوستاستىعى: تاريحى مەن بۇگىنى» تاقىرىبىنا شىعارما جازۋدا

استانا. قازاقپارات - ق ر پرەزيدەنتتىگىنە ءوزىن-ءوزى ۇسىنعان ءۋاليحان قايساروۆ مەملەكەتتىك ءتىلدى ەركىن مەڭگەرگەندىگىن دالەلدەۋ ءۇشىن سىناق تاپسىرۋدا.

ول سىناقتىڭ العاشقى كەزەڭىندە «تاۋەلسىز مەملەكەتتەر دوستاستىعى: تاريحى مەن بۇگىنى» تاقىرىبىندا 2 بەتتىك شىعارما جازۋ ۇستىندە.

كانديداتقا سىناق ەرەجەسىن تۇسىندىرگەن ق ر پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ: «ەمتيحان ءۇش كەزەڭمەن وتەدى. ءبىرىنشىسى، ەكى بەتتىك جازبا جۇمىسى. ونىڭ تاقىرىبى الدىن الا بەكىتىلگەن. وعان ۋاقىت جەتكىلىكتى بەرىلەدى. ەگەر 1 ساعاتتىڭ ىشىندە ۇلگەرمەي، بىزدەن رۇقسات سۇراساڭىز، تاعى 30 مينۋت قوسىپ بەرەمىز»، - دەدى.

كوميسسيا ءتوراعاسى كانديدات سىناقتىڭ 2- كەزەڭىندە قازاق ادەبيەتى كلاسسيكتەرىنىڭ ءبىرىنىڭ شىعارماسىنان 3 باسپا تاباق ءماتىندى مانەرلەپ وقيتىندىعىن ەسكە سالدى.

«ءۇشىنشىسى ەركىن سۇراق. بۇل دا الدىن الا بەكىتىلگەن تاقىرىپتار. سونىڭ ىشىنەن ءبىرىن تاڭداپ، دايىندالۋىڭىزعا ۋاقىت بەرىلەدى. دايىن بولعان سوڭ سول تاڭداعان تاقىرىبىڭىز توڭىرەگىندە 15 مينۋت ەركىن سويلەيسىز»، - دەدى م. جولداسبەكوۆ.

اۆتور: مارلان جيەمباي