ءۋاليحان قايساروۆ شەتەل ازاماتى ما؟

استانا. قازاقپارات - ق ر پرەزيدەنتتىگىنە ءوزىن- ءوزى ۇسىنعان ءۋاليحان قايساروۆ وتىنىشىندە باسقا مەملەكەتتىڭ ازاماتى ەكەندىگىن كورسەتكەن.

بۇل تۋرالى بۇگىن ق ر ورتالىق سايلاۋ كوميسسياسىنىڭ مۇشەسى ءلاززات سۇلەيمەن ءمالىم ەتتى.

«ۇمىتكەرلەردىڭ ءوز قولدارىمەن جازعان مالىمەتتەرىنىڭ ءوزىن ورتالىق سايلاۋ كوميسسياسى مۇقيات تەكسەرۋدە. مىسالى، ءوز كانديداتۋراسىن ۇسىنعان ۋ. قايساروۆ پرەزيدەنتتىككە كانديدات بولىپ داۋىسقا تۇسۋگە نيەت ءبىلدىرۋ تۋرالى وتىنىشىندە باسقا مەملەكەتتىڭ ازاماتتىعىندا تۇرعانىن ءوز قولىمەن كورسەتكەن»، - دەدى و س ك مۇشەسى.

ل. سۇلەيمەننىڭ اتاپ وتۋىنشە، وسىعان وراي ورتالىق سايلاۋ كوميسسياسى ەلىمىزدىڭ ىشكى ىستەر مينيسترلىگىنە اتالعان دەرەكتەردى تەكسەرۋ ءۇشىن سۇراۋ سالعان.

«سونىمەن قاتار وسى ۇمىتكەر مەملەكەتتىك تىلدە تولتىرىلعان ءومىرباياندىق دەرەكتەرىندە دە بىرنەشە قاتە جىبەرگەن»، - دەدى ول.

 اۆتور: مارلان جيەمباي