ىستامبۇلدا ومىرگە قۇشتار، قايسار قازاق قىزىنىڭ كەشى ءوتتى
ول جارىق دۇنيەگە ساۋ بولىپ كەلىپ، ون جاسىندا شاشىراڭقى سكلەروز اۋرۋىنا شالدىقتى.
ال جيىرماعا تولعاندا سول مي مەن جۇلىنعا اسەر ەتۋشى جۇيكە جۇيەسى اۋرۋىنان اياقتارى جۇرمەي، قوس جانارى كورۋدەن قالادى.
قازىر وزدىگىنەن قوزعالا المايدى، ارباعا تاڭىلعان. سويتسە دە، وقۋ ورىندارىن ۇزدىك ءتامامداپ قاتارىنان قالعان جوق، دەپ حابارلايدى 24.kz.
شاشىراڭقى سكلەروز - جاس جەتكىنشەكتەردە ءجيى كەزدەسەتىن جۇيكە جۇيەسىنىڭ سوزىلمالى اۋرۋى. ونىڭ دەرتىنە شالدىققان ادام قيمىل- قوزعالىسى، كورۋ مەن ەستۋ قابىلەتىنەن ايرىلادى. بويىنداعى سابىرلىعى مەن قايسار مىنەزىنىڭ ارقاسىندا قارشاداي قىز تاۋداي قيىندىقتارعا تاپ بولسا دا، ءومىردىڭ بارلىق سىناقتارىن ەڭسەرۋمەن كەلەدى.
مەرۆەنى وسى قاسيەتى ءۇشىن قۇربى- قۇرداستارى ەرەكشە قادىرلەيدى. ول ارباعا تاڭىلسا دا، قوعامدىق ومىردەن قالىس قالمادى. ءوز كۇشىمەن جوعارى وقۋ ورنىنا ءتۇسىپ، زاڭگەر ماماندىعى بويىنشا ءبىلىم الىپ شىقتى. ماقساتى - ءوزى سەكىلدى مۇگەدەك جانداردىڭ قۇقىعىن قورعاۋ.
«تۇركيادا مۇگەدەكتەر قوعامنىڭ تولىققاندى مۇشەسى رەتىندە سەزىنە الماي كەلەدى. ويتكەنى اياق- قولى ساۋ ادامدار مەن كوڭىلى جارىمجان مۇگەدەكتەر اراسىندا ورتاق بايلانىس جوق. ءتىپتى ءبىر- بىرلەرىن جاقىننان تانىپ، بىلگىسى كەلمەيتىندەي كورىنەدى. مەن بۇل سەڭدى بۇزعىم كەلەدى. سول ءۇشىن گازەتتەرگە مۇگەدەك جانداردىڭ ىشكى ماسەلەسىن، جانايقايىن كوتەرىپ، ءجيى ماقالا جازىپ ءجۇرمىن. اينالامداعىلار بۇل ەڭبەگىمە العىسىن جاۋدىرىپ، باعالاپ جاتسا، دەمەك پايدالى ىسپەن شۇعىلدانۋدامىن»، - دەيدى II توپتاعى مۇگەدەك مەرۆە قاراقول. ىستامبۇلدا قازاق تۇرىكتەرى مادەني قورىنىڭ ۇيىمداستىرۋىمەن مەرۆە قاراقولدىڭ كەشى ءوتتى. وعان ەۋروپا مەن تۇركياداعى قازاق دياسپورالارىنىڭ وكىلدەرى، قوعامدىق ۇيىمنىڭ بەلسەندىلەرى قاتىسىپ، قازاقتىڭ قايسار قىزىنىڭ ومىرىمەن كەڭىنەن تانىسۋعا مۇمكىندىك الدى. شارانى ۇيىمداستىرۋشىلار بۇل كەشتىڭ تاربيەلىك ءمانى زور دەيدى.
«نەمات كەلىمبەتوۆ جاس كەزىندە وپەراتسيادان كەيىن اياعى جۇرمەي قالعان، قولى ۇستاماي قالعان، سوعان قاراماستان ول كىسى ۇلى ىستەردىڭ باس- قاسىندا بولىپ، ۇلكەن عالىم بولدى. ءبىز دە وسى قىزىمىز ەرىك- جىگەرىمەن كەلەشەكتە جاستارعا ۇلگى بولاتىن عالىم بولا ما، ساياسي قاتىناستار بىتىرگەن ەكەن، ديپلومات بولا ما جۇمىس ىستەگەندە ماراپاتتاپ، قادىرىن بىلگەن جاقسى عوي»، - دەگەن جۇرەكجاردى پىكىرىن بىلدىرەدى ميمار سينان كوركەمونەر ۋنيۆەرسيتەتىنىڭ پروفەسسورى ءابدىۋاقاپ قارا.
ال تۇركياداعى قازاق دياسپوراسىنىڭ وكىلى ەليپ يناننىڭ ايتۋىنشا، ول تۇركيادا تۇراتىن بارلىق قازاقتارعا ۇلگى. نەگە دەسەڭىز، ومىردە كورگەن قيىنشىلىقتارعا مويىن يگەن جوق.
بۇل كەشتە تاعدىردىڭ تاۋقىمەتىنە ءتوزىپ، ءومىردىڭ قيلى سىناقتارىنا تاباندىلىق تانىتا بىلگەن قايسار قىزعا حالىق تىك تۇرىپ قوشەمەت كورسەتتى. «كوپتىڭ جان جىلۋىن سەزىنىپ، كوڭىلىم جاي تاپتى. جاناشىرلارىمنىڭ كوپتىگىمەن قاناتتانىپ، ومىرگە دەگەن قۇشتارلىعىم ارتا ءتۇستى»، - دەيدى قازاقتىڭ قارا دومالاق قىزى.
