قازاق حاندىعى تۋرالى سەريالعا بولىنگەن قارجى مۇلدە جەتكىلىكسىز
قازاق حاندىعىنىڭ 550 جىلدىعى اياسىندا جارىق كورەتىن كوپ سەريالى تاريحي تۋىندى «قازاق ەلى» دەپ اتالاتىن بولدى.
الايدا «قازاق فيلم» كينوستۋدياسى ءۇشىن ۇلكەن سىن بولايىن دەپ تۇر. اڭگىمەنىڭ ءالقيسساسىن جوباعا بولىنگەن قارجى تىم از دەپ باستاعان كينوستۋديا باسشىلارى دەمەۋشىلەردىڭ كومەگىنە مۇقتاج ەكەندەرىن جەتكىزدى. ارنايى ەسەپشوت تا اشىلعان. ايتۋلارىنشا، بولىنگەن قارجى «جاۋجۇرەك مىڭ بالا» فيلمىنىڭ بيۋجەتىنەن ءۇش ەسە از. ءتۇسىرىلىم جۇمىستارى تۇگەلدەي الماتى وبلىسىندا وتەدى.
بۇعان دەيىنگى تاريحي تۋىندىلاردا پايداعا اسقان رەكۆيزيت پەن دەكوراتسيا تۇگەلدەي قولدانىلادى. ال جوبا تاريحي بولعاندىقتان تاريحي فاكتىلەر دە، عىلىمي ەڭبەكتەر دە ەسكەرىلەدى دەيدى سەناريستەر.
«ءبىز قاتەلەسەتىن بولساق، وندا بۇكىل تاريحشىلار قاتەلەسكەن بولۋى مۇمكىن. ويتكەنى ءبىز سولارعا، تاريحي فاكتىلەرگە سۇيەندىك. تەك قانا بۇگىنگى ەمەس، سوناۋ دۋلاتيدان باستاپ، رۋزبيحاننان باستاپ، كەشەگى ورتاعاسىرلىق تاريحشىلاردىڭ بارلىق ەڭبەگى ءبىزدىڭ نازارىمىزدان ءوتتى»، - دەيدى سەناري اۆتورى سماعۇل ەلۋباي.
سەناريگە اسا قاتتى كوڭىل بولىنۋدە دەگەن جوبا جەتەكشىلەرى ون سەريانىڭ جەتەۋى جانىبەك پەن كەرەي حاننىڭ كەزەڭىنە ارنالادى دەيدى.
ال ءۇش سەريادا قاسىم حان مەن بۇرىندىق حاننىڭ بيلىك قۇرعان مەرزىمى كورسەتىلەدى. تۋىندى بارىنشا قىزىقتى، سيۋجەتتىك جەلىسى تارتىمدى، ماعىناسى تەرەڭ بولادى دەگەن اۆتورلار دايىندىق جۇمىستارى قىزۋ ءجۇرىپ جاتقانىن ايتتى. اكتەرلەردى ىرىكتەۋ جالعاسۋدا.
ءبولىنىپ جاتقان قاراجاتتىڭ جەتپەيتىنى قازىردىڭ وزىندە بەلگىلى بولىپ تۇر.
«سەناري دايىن بولعاننان كەيىن ناقتى باعاسىن شىعارىپ، ايتۋعا بولادى. ءبىراق قىمبات بولاتىنى قازىردىڭ وزىندە ايقىن. ويتكەنى تاريحي، وتە اۋقىمدى جۇمىس جاسالادى. كوپشىلىك تاعاتسىزدانا كۇتكەن كوپ سەريالى تاريحي تۋىندىنىڭ ءتۇسىرىلىم جۇمىستارى ماۋسىم ايىنان قىركۇيەك ايىنا دەيىن جالعاسادى. ال اكتەرلىك قۇرام 99 پايىز قازاقستاندىق بولادى دەگەن باسشىلىق «قازاق ەلى» دەپ اتالاتىن بۇل تۋىندىنى تاۋەلسىزدىك مەرەكەسىنە وراي جۇرت نازارىنا ۇسىنۋدى جوسپارلاپ وتىر.
