وسكەمەندە «اسسامبلەيا ارۋى» بايقاۋى وتكىزىلدى
كونسەرتتە سونىمەن بىرگە، كوپ بالالى انالارعا مەرەكەلىك سىيلىقتار تابىس ەتىلدى.
وبلىستىق دوستىق ۇيىندە وتكىزىلگەن شارادا ش ق و ق ح ا حاتشىلىعىنىڭ مەڭگەرۋشىسى ەركىنبەك ايازبايەۆ كورەرمەن زالىنداعى بارلىق نازىك جاندىلاردى مەرەكەسىمەن قۇتتىقتادى.
«قۇرمەتتى انالار، اپكەلەر مەن قارىنداستار بارشالارىڭىزدى شىن جۇرەكتەن كوكتەمدەي كوركەم مەيرامدارىڭىزبەن قۇتتىقتايمىن. بۇگىنگى كۇنى وڭىرىمىزدە 110 ەتنومادەني ورتالىق پەن قوعامدىق ۇيىم بولسا، سولاردىڭ 66 نازىك جاندىلار جەتەكشىلىك ەتەدى. بۇل كورسەتكىش ايەلدەر قاۋىمىنىڭ قوعامدىق ومىردەگى بەلسەندىلىگىن تانىتادى. سىزدەرگە مىزعىماس دەنساۋلىق، باياندى باقىت، ەڭبەكتەرىڭىزگە تابىس تىلەيمىن»، - دەگەن ە. ايازبايەۆ كوپ بالالى 5 اناعا گۇل شوقتارى مەن مەرەكەلىك سىيلىقتاردى تارتۋ ەتتى.
ش ق و اقپاراتتىق ورتالىعىنىڭ حابارلاۋىنشا، بۇدان كەيىن زالداعى ايەلدەر قاۋىمىنىڭ بارلىعىنا گۇل شوقتارى تابىستالىپ، اسسامبلەيا ارۋلارى ورتاعا شىقتى. كورەرمەندەردى كوركىمەن باۋراعان 10 ەتنوستىڭ سۇلۋلارى ۇلتتىق كيىمدە ونەرلەرىن پاش ەتىپ، كوپشىلىكتىڭ ىقىلاسىنا بولەندى. كونسەرتتە ءار ۇلتتىڭ ءبيىن بيلەگەن ارۋلار جەزتاڭداي انشىلىگىمەن دە تامساندىردى. كونسەرت قورىتىندىسى بويىنشا، دوستىق ۇيىندە وتكەن بايقاۋدا دوستىق جەڭىپ، اسسامبلەيا ارۋلارىنىڭ بارلىعى اتاۋلى 10 نوميناتسياعا يە بولدى.
