الماتىدا ماتادان قۇرىلىس قولعاپتارىن شىعاراتىن العاشقى كاسىپورىن ىسكە قوسىلدى - فوتو

الماتى. قازاقپارات - الماتىدا قازاقستانداعى تۇڭعىش ماتادان قۇرىلىس قولعاپتارىن شىعاراتىن كاسىپورىن ىسكە قوسىلدى. «دامۋ» قورىنىڭ قولداۋىمەن «بيزنەستىڭ جول كارتاسى» باعدارلاماسى اياسىندا كاسىپكەر جابدىقتار مەن شيكىزاتتى ساتىپ الدى. ەندى ول باعاسى جاعىنان وسى ءونىمنىڭ نەگىزگى جەتكىزۋشىسى - قىتايمەن باسەكەلەسە الادى.

«كاسىپكەر العاشقى جابدىق پەن شيكىزاتتى ساتىپ الۋعا 3 ميلليون تەڭگە الدى. ودان ءارى جوبا ويداعىداي ىسكە قوسىلدى، ول بىزدەن كەپىلدىكپەن قوسىمشا جابدىقتار الۋعا 8 ميلليون تەڭگەدەن استام زاەم الدى»، - دەدى «دامۋ» قورىنىڭ الماتى قالاسى بويىنشا فيليالىنىڭ باس مەنەدجەرى زارينا كارمەنوۆا.

«سونداي-اق ءبىز «دامۋ» قورىنان سۋبسيديالار كەپىلدىگىن الدىق. ءبىز ىنتىماقتاسىپ وتىرعان بانك 14 پايىزبەن نەسيە بەردى، ونىڭ 7 پايىزىن مەملەكەت تولەيدى، ال 7 پايىزىن ءوزىمىز تولەيمىز»، - دەدى «KazComfort» ش س ديرەكتورى ماحامبەت اسابايەۆ.

كاسىپورىن قۋاتى - تاۋلىگىنە 5 مىڭ جۇپ قولعاپ شىعارۋعا ەسەپتەلگەن. ءوندىرۋشى ساپاسىنا، مولشەرى مەن باسقا دا تەحنيكالىق پارامەترلەرى جونىنەن ستاندارتقا ساي بولۋىنا كەپىلدىك بەرەدى. وتاندىق ءونىمنىڭ يمپورتتىق وندىرىستەن ارتىقشىلىعى - قولعاپتىڭ الاقانىنا پوليحلورۆينيل ەمەس، گەل جابىنى سالىنعان.

«ءونىمنىڭ بەرىكتىگىن ايتۋعا بولادى، سوندىقتان دا ۇيكەلىسكە شىدامدى. سونىمەن بىرگە ءبىز تاپسىرىسقا وراي كەز كەلگەن كومپانيانىڭ برەندىن، لوگوتيپىن سالىپ بەرە الامىز»، - دەپ ءتۇسىندىردى م. اسابايەۆ.

تاياۋداعى ۋاقتىتتا كاسىپورىن «دامۋ» قورىنىڭ كومەگىمەن قوىسمشا جابدىقتار ساتىپ الادى، ءسويتىپ، ءوندىرىس قۋاتتارىن ارتتىرا وتىرىپ، ە ا ە و نارىعىنا شىعۋدى كوزدەپ وتىر.