قازىنا قارجىسىنان جۇمسالعان ءار تيىن تەكسەرىلەتىن بولدى
جۇمسالعان قارجىنىڭ تيىمدىلىگى قاتاڭ تەكسەرىلىپ، ءار تيىنى ەسەپتەلەدى. باقىلاۋدى كۇشەيتۋ ماقساتىندا سالىق، كەدەن جانە قارجى ورگاندارىمەن ارنايى توپ قۇرىلدى.
جۋرناليستەرمەن تىلدەسۋ بارىسىندا ەلىمىزدىڭ قارجى ءمينيسترى وسىلاي دەپ مالىمدەدى. باقىت سۇلتانوۆ فيسكالدى ورگانداردىڭ جۇمىسىن جەتىلدىرۋگە كۇش سالىنىپ جاتقاندىعىن جەتكىزدى. وسىلايشا كولەڭكەلى ەكونوميكامەن كۇرەسۋ كوزدەلۋدە.
مينيستر ءوز سوزىندە مەملەكەتتىك بيۋدجەتتىڭ شىعىستارى 10 پايىزعا وڭتايلانىپ، 700 ميلليارد تەڭگەگە ۇنەمدەلەتىنىن اتاپ ءوتتى. الەمدىك داعدارىس پەن مۇناي باعاسىنىڭ قۇلدىراۋىنا بايلانىستى كەيبىر جوبانى كەيىنگە قالدىرۋعا تۋرا كەلگەن. ەسەسىنە شىعىن كولەمى شەگەرىلدى. باقىت سۇلتانوۆتىڭ ايتۋىنشا، قازىنا قارجىسىن قايتا قاراۋ بارىسىندا مۇنايدىڭ ءبىر باررەلى 50 ا ق ش دوللارى شاماسىندا ەسەپتەلدى.
«بيىل جالپى ىشكى ءونىمنىڭ ءوسىمى 1,5 پايىز دەڭگەيىندە ساقتالادى»، - دەدى مينيستر. باقىت سۇلتانوۆ، ق ر قارجى ءمينيسترى: - بيۋدجەتتەگى الەۋمەتتىك شىعىستاردىڭ دەڭگەيى، بۇرىن جوسپارلانعانداي، 39 پايىز دەڭگەيىندە قالادى. ناقتىلاۋ اياسىندا بيۋدجەت تاپشىلىعى دا 259 ميلليارد تەڭگەگە ۇلعاياتىن بولادى. جالپى، مەملەكەتتىك قارىز قاۋىپسىزدىگى دەڭگەيى دە شامامەن ءج ءى ءو- نىڭ 16 پايىزىندا قالادى.
www.24.kz
