مۇحتار شەرىم. ايەلدەر جينالىسى

استانا. قازاقپارات - ءسىز، ءيا ءسىزدى ايتىپ وتىرمىن، وسى جولداردى وقىپ وتىرعان، وقىرمانىم، كوز الدىڭىزعا ەلەستەتىپ كورىڭىزشى: پارلامەنت ءماجىلىسىنىڭ دەپۋتاتتارى «مەكتەپ وقۋشىلارى» سياقتى، سىزدەر، ءيا، ايەلدەردى ايتامىن، ايىنا ءبىر رەت «ايەلدەر جينالىسىنا» قاتىسىپ جۇرەتىن بولساڭىزدار. مەكتەپتەگى اتا-انالار جينالىسى سياقتى...

ءبىرىنشى اڭگىمە: «ءيا، نە دەيدى؟» - دەپ سۇرايدى دەپۋتات كۇيەۋىڭىز.

«سپيكەر ءبارىمىزدى الداعى كەلە جاتقان 8 - ناۋرىز ايەلدەر مەرەكەسىمەن قۇتتىقتاپ، 107 ايەلدىڭ بەتىنەن كەزەكپەن ءسۇيىپ شىقتى...». «ءيا، مەن تۋرالى نە دەدى؟ ماقتادى ما؟»، «ماۋباس ەكەنسىڭ عوي تەگى... جەرگە كىرىپ كەتەيىن دەسەم، جىلتىراعان كافەلدەردىڭ اراسىنان تەسىك تاپپادىم! ماجىلىسكە كىرگەننەن پىرىلدايدى ەكەنسىڭ! ءۇش جىل بولىپتى عوي، ۇيىقتاپ جۇرگەنىڭە. ۇيالعانىمنان «ۇيدە تۇندە ۇيىقتامايدى» دەپ اقتالىپپىن...

«جاستىق الا كەلسىن» دەپ وتىر. وسى سەن نە ءۇشىن دەپۋتات بولىپ ءجۇرسىڭ ءوزى؟» «سەن ءۇشىن عوي، جانىم...»، «نەگە؟» «دەپۋتاتتىڭ قاتىنى اتانۋىڭ ءۇشىن...»

ەكىنشى اڭگىمە: «بارىپ كەلدىم ايەلدەر جينالىسىنا. جارايسىڭ-ەي! دەپۋتاتتار ستاروستاسى ەكەنسىڭ عوي! توبەلەسپەيدى دە ەكەنسىڭ. «پەرەمەن» كەزىندە اسىر سالىپ جۇگىرمەيدى ەكەنسىڭ. ايەل دەپۋتاتتاردىڭ باسىنا پورتفەلىڭمەن ۇرمايدى ەكەنسىڭ. قانداي زاڭ قابىلدانىپ جاتسا دا، «ماقۇل، ماقۇل!» دەپ باسىڭدى شۇلعي بەرەدى ەكەنسىڭ.!».

«قويشى، ماقتادى ما؟». «ماقتاعاندا قانداي! تۇك بىلمەسەڭ دە: «مەن ايتايىنشى، مەن ايتايىنشى!» دەپ قولىڭدى كوتەرە بەرەدى ەكەنسىڭ... «ەندى، جۇرت بىلگىش ەكەن دەپ ويلاسىن دەگەنىم عوي...»

ءۇشىنشى اڭگىمە: «بارىپ كەلدىڭ بە جينالىسقا؟» «باردىم. اشەيىندە ۇيدە قاتالسىڭ. ال ماجىلىستە كوڭىلىڭ بوساپ، كەمسەڭدەي بەرەتىنىڭ قالاي؟» «ە، قاشان جىلاپپىن؟» «داعدارىسقا بايلانىستى دەپۋتاتتاردىڭ دا ايلىعىن قىسقارتايىق» دەگەندە باقىرىپ جىلاپ جىبەرىپسىڭ عوي! ىشىڭنەن جىلاساڭ بولمايدى ما؟ ۇيالعانىم-اي! «قايتەم ەندى... ەكونوميكالىق داعدارىس كەزىندە دەپۋتاتتاردى پاتەرلەرى مەن قىزمەتتىك كولىكتەرىنەن ايىرۋ كەرەك دەپ جاتسا... «جوعا، الدىمەن باسقالار جىلاسىن دەپ جاتقانىم عوي... ەڭ سوڭىندا سىڭسىساڭ دا بولار ەدى عوي...»

ءتورتىنشى اڭگىمە: «نە دەدى، ا؟» «ەشتەڭە دەگەن جوق. سەنىڭ بارىڭنان جوعىڭ جاقسى. سەنىڭ دەپۋتات ەكەنىڭدى ارىپتەستەرىڭ بىلمەيدى دە ەكەن. كوزگە كورىنبەيدى ەكەنسىڭ عوي؟» «نە ۆيديمكا» بولعانىم جاقسى ەمەس پە؟ كوزگە تۇسە بەرسەڭ، ءتىل-كوز تيەدى دەگەندەي...»، «ءجۇر ەندەشە، تۇكىرتىپ كەلەيىن...»

مىنە، قۇرمەتتى وقىرمان، جازعى كانيكۋلعا دەيىن ءالى تالاي ايەلدەر جينالىسى بولادى! تەك ءبىر ايىرماشىلىعى، مەكتەپتەگىدەي دەپۋتاتتاردان اقشا جينالمايدى ەكەن...