كوكشەتاۋدا وتاندىق ونىمگە سۇرانىس ارتقان
قالاداعى بىرنەشە ءىرى ساۋدا ورتالىعىنداعى وتاندىق ونىمدەر جايعاسقان سورەلەرگە «قازاقستاندا جاسالعان» دەگەن جازۋى بار ءتۇرلى-ءتۇستى بەلگى-تاقتايشالار قويىلدى. بۇل ەرەكشەلىك كوكشەتاۋلىقتاردى بىردەن باۋرادى. شارانىڭ ماقساتى دا وسى. قازاقستاندىق ءونىمدى ايشىقتاپ، ساتىپ الۋشىلاردىڭ نازارىن اۋدارۋ. ونسىز دا وتاندىق ازىق-تۇلىكتى تۇتىنعاندى ءجون كورەتىن كوكشەلىكتەر بۇگىن ايرىقشا بەلسەندىلىك تانىتتى. ايتا كەتۋ كەرەك، قازىر كوكشەتاۋدا كۇندەلىكتى قولدانىسقا قاجەتتى ءونىم وندىرەتىن 20 عا جۋىق كاسىپورىن بار. ال كارتوپ، ەت، ءسۇت جانە ۇن ونىمدەرىمەن وبلىس ءوزىن-ءوزى تولىق قامتاماسىز ەتىپ وتىر.
- قالامىزدا شىعاتىن سۇتتەردىڭ ساپاسى دا، قايماعىنىڭ قويۋلىعى دا جاقسى. سىرتتان كەلەتىندەردىڭ مەرزىمى ءوتىپ كەتۋى دە مۇمكىن، دەيدى قالا تۇرعىنى قۇمارعالي دوسوۆ.
«بىزدەگى ونىمدەردىڭ باسىم بولىگى قازاقستاندىق وندىرۋشىلەردىكى. اتاپ ايتساق، ازىق- تۇلىكتەردىڭ %80 ى - وتاندىق ءونىم. وعان قوسا ءوزىمىزدىڭ ناۋبايحانامىز بەن كونديتەرلىك سەحىمىزدان شىققان ونىمدەردى دە وسىندا ساتامىز. سوڭعى كەزدە كوكشەتاۋلىقتار اراسىندا وتاندىق ونىمگە دەگەن سۇرانىستىڭ ارتقانى بايقالادى. بۇل تۇرعىنداردىڭ ساپاعا قاتتى كوڭىل بولە باستاعانىن كورسەتەدى. قازاقستاندىق تاۋارلارعا قاتىستى ساتىپ الۋشىلار تاراپىنان ازىرگە ەشقانداي شاعىم تۇسكەن ەمەس»، - دەدى ساۋدا ورتالىعىنىڭ ديرەكتورى سەرگەي زاكيروۆ.
