شىمكەنتتەگى ءجىپ ءيىرۋ فابريكاسىنىڭ جۇمىسى جانداندى
بۇل تۋرالى و ق و اكىمىنىڭ باسپا ءسوز قىزمەتىنەن حابارلادى.
«بايتەرەك» ۇلتتىق باسقارۋشى حولدينگىنىڭ» قولداۋىمەن جۇمىسى قارقىن العان كاسىپورىندا بۇگىندە توقساننان استام ادام جۇمىس جاساۋدا. ءوندىرىس تولىق قۋاتتىلىققا شىققاندا 270 ادامدى جۇمىسپەن قامتۋ جوسپارلانۋدا. فابريكا شيكىزاتتى «Baiterek Venture Fund» ا ق تاراپىنان بولىنگەن 907,5 ميلليون تەڭگە قاراجاتقا الىپ وتىر. ماقتا- ماتا ءجىپ ءيىرۋ ءوندىرىسى بويىنشا كاسىپورىن تولىق ىسكە قوسىلعاننان كەيىن ونىڭ قۋاتتىلىعىن جىلىنا 6183 توننا دايىن ءونىم الۋعا دەيىن جەتكىزۋ كوزدەلۋدە.
ءوندىرىس توقىما ونەركاسىبىندە پايدالانىلاتىن زاماناۋي تەحنولوگيالارمەن جابدىقتالعان. شىعارىلاتىن ءونىم حالىقارالىق ستاندارتقا سايكەس. باستاپقى كەزەڭدە كاسىپورىننىڭ دايىن ءونىمى ەكسپورتقا شىعارىلسا، كەلەسى كەزەڭدە ونىمدەر ىشكى نارىققا باعىتتالماق. قازىرگى تاڭدا ەكسپورت بويىنشا كورشىلەس قىتاي مەملەكەتىمەن كەلىسسوزدەر جاسالۋدا.
وڭتۇستىك قازاقستان وبلىسى اكىمىنىڭ ورىنباسارى ساپاربەك تۇياقبايەۆ: «وڭتۇستىك قازاقستان وبلىسىنىڭ اكىمدىگى تاراپىنان «Oxy Textile» ج ش س ساۋىقتىرۋدىڭ ءار كەزەڭىندە جان- جاقتى قولداۋ جاسالدى. بۇگىندە «وڭتۇستىك» ارنايى ەكونوميكالىق ايماعىنا» قاجەتتى ينجەنەرلىك ينفراقۇرىلىم تارتىلعان. بۇگىندە ايماقتا 21,665 ميلليارد تەڭگەنى قۇرايتىن 8 جوبا ىسكە اسىپ، 1445 جۇمىس ورنى اشىلعان. ودان بولەك، قۇنى 114,7 ميلليارد تەڭگەنى قۇرايتىن 11 جوبا اياسىندا جۇمىستار جۇرگىزىلۋدە، جوبالار ىسكە اسقاندا وسىندا 7141 جۇمىس ورنى اشىلادى»، - دەدى.
