ءسۇت بەزىنىڭ قاتەرلى ىسىگى وزەكتى ماسەلەلەردىڭ بىرىنە اينالدى - الما جىلقايداروۆا
بۇل تۋرالى الماتىدا وتكەن باسپا ءسوز ءماسليحاتىندا قازاق ونكولوگيا جانە راديولوگيا ع ز ي ارنايى كەڭەس بەرۋ- دياگنوستيكالىق ءبولىمىنىڭ جەتەكشىسى، مەديتسينا عىلىمدارىنىڭ دوكتورى الما جىلقايداروۆا مالىمدەدى.
ونىڭ ايتۋىنشا، ءسۇت بەزى قاتەرلى ىسىگى دەرتىنە شالدىعۋ سوڭعى ءۇش جىل بويى ونكولوگيالىق اۋرۋلار ىشىندە ءبىرىنشى ورىندا كەلەدى.
«قازاقستاندا جىلىنا 3800-4000 جۋىق ايەلگە ءسۇت بەزى قاتەرلى ىسىگى دياگنوزى قويىلادى. كۇنىنە شامامەن 10 ايەل، دالىرەك 10 جانۇيا، وتاناسىنىڭ نەمەسە سول ءۇيدىڭ قىزىنىڭ، اجەسىنىڭ ءسۇت بەزى قاتەرلى ىسىگىنە شالدىققانى جايلى جاعىمسىز حابار ەستيدى. سوندىقتان، بۇل دەرت سوڭعى جىلدارى وزەكتى ماسەلەلەردىڭ بىرىنە اينالۋدا، - دەدى ا. جىلقايداروۆا.
سونداي- اق، الما جالەل قىزى ءسۇت بەزى قاتەرلى ىسىگىن الدىن الۋدا سكرينينگتىك دارىگەرلىك تەكسەرۋلەردىڭ ماڭىزدى ەكەندىگىن ايتتى.
«قازىر ەلىمىزدە «سالاماتتى قازاقستان» مەملەكەتتىك باعدارلاماسى جۇزەگە اسىرىلۋدا. سونىڭ اياسىندا 2008 - جىلدان بەرى سكرينينگ باعدارلاماسى جۇرگىزىلىپ كەلەدى. ال وعان دەيىن ەلىمىزدە جىلىنا 3000 جۋىق ءسۇت بەزى قاتەرلى ىسىگى انىقتالىپ ءجۇردى. ال ونىڭ ءبىرىنشى جانە ەكىنشى ساتىسىنىڭ ۇلەستىك سالماعى 67 پايىزدى قۇرايتىن. ال قازىرگى تاڭدا جىلىنا 3800-4000 ءسۇت بەزى قاتەرلى ىسىگى انىقتالاتىن بولسا، ءبىرىنشى جانە ەكىنشى ساتىلارىنىڭ ۇلەستىك سالماعى 77 پايىزدى قۇرايدى» - دەدى ا. جىلقايداروۆا.
ايتا كەتەلىك، قازىرگى تاڭدا قازاقستاندا ونكولوگيالىق اۋرۋلاردىڭ التى ءتۇرى بويىنشا سكرينينگتەر جۇرەدى. ولار: ءسۇت بەزى قاتەرلى ىسىگى، جاتىر موينى، كولورەكتالدى، وڭەش جانە اسقازان، قۋىق استى بەزى جانە باۋىر قاتەرلى ىسىكتەرى.
2014 - جىلى جوعارىدا كەلتىرىلگەن سكرينينگتەر بويىنشا جالپى 2331247 تەكسەرۋ جۇرگىزىلىپ، 2021 ادامعا قاتەرلىك ىسىك دەرتى دياگنوزى قويىلعان. دەمەك، بۇل 1000 ادامنىڭ بىرەۋىنەن قاتەرلى ىسىك تابىلىپ وتىر دەگەن ءسوز.
اۆتور: جاپپاربەرگەن ايبوتا
