ەل مىقتى بولسا، ەل اعاسىنان، ءۇي مىقتى بولسا، بەل اعاشىنان
«قازاقستان حالقى اسسامبلەياسى كەڭەسى مۇشەلەرىنىڭ الەمدەگى، سونداي-اق، ەلىمىزدەگى قالىپتاسىپ وتىرعان ەكونوميكالىق جاعدايلارعا بايلانىستى احۋالدى ەسكەرە كەلىپ، قازاقستان پرەزيدەنتىن مەرزىمىنەن بۇرىن سايلاۋ تۋرالى جانە بۇل سايلاۋدا مەملەكەت باسشىسى نۇرسۇلتان نازاربايەۆقا جاڭا پرەزيدەنتتىك ماندات بەرۋ جايلى ۇندەۋى دەر كەزىندە جاريالانىپ وتىر دەپ سانايمىن. راس، قازىرگىدەي دۇنيە الاساپىران بولىپ، داعدارىس دەگەن تاجال ءار ەلدىڭ جاعاسىنان الىپ جالاڭداپ وتىرعاندا، حالىق وعان قارسى بولا قويماس.
ەكىنشىدەن، تورتكۇل دۇنيەدە بولىپ جاتقان سوعىس اتاۋلىنى، بۇلىكشىلىكتى كورىپ، ءبىر كۇن اش، ءبىر كۇن توق وتىرساق تا، تىنىشتىق ءومىردىڭ باعاسىن بىلەمىز. ال سول تىنىشتىق، بەيبىت ومىرگە دانەكەر بولىپ، جارعاق قۇلاعى جاستىققا تيمەي، سىرتتاعى جانە ىشتەگى احۋالدى دا رەتتەستىرىپ، سوعان ۇيىتقى بولىپ وتىرعان كىم؟ ارينە، ەلباسى، - دەيدى ا. وسمانوۆا.
«ال مەن نەگە قولىمنان كەلگەنشە نازاربايەۆتى قولدايمىن؟ نەگە سايلاۋدىڭ ەرتە وتۋىنە مۇددەلىمىن؟!. قازاق ايتادى ەمەس پە: «ەل مىقتى بولسا، ەل اعاسىنان، ءۇي مىقتى بولسا، بەل اعاشىنان» دەپ. شىنتۋايتىنا كەلگەندە، نازاربايەۆ - بىلگىر، دانا، كورەگەن، الدىن بولجاي الاتىن، ەشكىمدى ءبولىپ-جارمايتىن، بارشانىڭ بالاسىن باۋىرىنا باسقان قازاق بولسا، سول قازاقتىق رۋحتاعى بۇگىنگى تاڭداعى كوشباسشىمىز. ول بىردە-ءبىر ۇلتتىڭ وكىلىن الالاماي، تەڭدىكتە ۇستاپ، ەلىمىزدەگى ىنتىماقتى، تۇراقتىلىقتى، تۋىستىقتى، تاتۋلىقتى ساقتاپ، تۋ ەتىپ وتىر»، - دەپ اتاپ ءوتتى قوعام قايراتكەرى.
ەش ۋاقىتتا ەلىمىزدەگى دوستىق، بىرلىك، ىنتىماقتىڭ شەكاراسى بۇزىلماسىن. ونىڭ بارلىعىنا ۇيىتقى بولىپ وتىرعان مەنىڭ قازاعىم ەكەنىن ەشكىم ەشقاشان ۇمىتپاۋى كەرەك. ال سونىڭ ءبارىن جۇيەگە كەلتىرىپ، ۇقساتىپ، بولمەي-جارماي ۇستاعان مەملەكەت باسشىسى نۇرسۇلتان نازاربايەۆتىڭ كەرەمەت كەمەل ساياساتى، ەرەن ەڭبەگى.
«حالىق قۇدايدان ءبىر جاس كىشى» دەگەن. مەن - ەل ءىشىن كوپ ارالاپ، حالىقپەن ەتەنە ارالاسىپ جۇرگەن اداممىن. ەلدىڭ پەيىلىن، پىكىرىن بىلەمىن. سوندىقتان، حالىقتىڭ پىكىرىمەن، حالىقتىڭ ويىمەن ساناسىپ، ماڭگىلىك ەلىمىزدىڭ كوشباسشىسىن - ەلباسىمىزدى وسىنداي جولمەن سايلاپ الساق، قۇبا-قۇپ بولار ەدى»، - دەدى اسىلى وسپانوۆا.
