پايعامبارىمىز (س.ع.س) قالاي ۇيلەنگەن؟

استانا. قازاقپارات - حازىرەتى حاديشانىڭ ءۋاراقا بين ءناۋفال بەرگەن ءسۇيىنشى حاباردان كەيىن پايعامبارىمىزدىڭ جاقسى قاسيەتتەرىن كورىپ، ونىڭ ايەلى بولۋعا، وعان قىزمەت ەتۋگە قۇشتارلىعى ارتتى. ءنافيسا بينتي ءمۋنيا بۇل جاعدايدى سەزىپ، اراعا ءتۇستى.

وسى نيەتپەن پايعامبارىمىزعا بارىپ: «ءيا، مۇحاممەد! ۇيلەنۋىڭىزگە نە كەدەرگى بولىپ ءجۇر؟» دەپ سۇرادى. پايعامبارىمىز: «ۇيلەنۋ ءۇشىن قولىمدا جەتكىلىكتى اقشا جوق» دەدى. ءبيبى ءنافيسا: «ءيا، مۇحاممەد! ەگەر ارلى، ابىرويلى، تانىمال، سۇلۋ ايەلگە ۇيلەنگىڭىز كەلسە قىزمەتىڭىزگە ءازىرمىن» دەدى. پايعامبارىمىز: «ول ايەل كىم؟» دەپ سۇراعاندا «حاديشا بينتي ءحۋۋايليد (رادياللاھۋ انھا)» دەدى.

راسۋلۋللاھ: «بۇل ىستە اراعا كىم تۇسەدى؟» دەگەندە «بۇل ءىستى مەن اتقارامىن» دەدى دە، حازىرەتى حاديشاعا بارىپ ءسۇيىنشى حاباردى جەتكىزدى. حازىرەتى حاديشا تۋىسى امر بين ءاساد پەن ءۋاراقا بين ءناۋفالدى شاقىرىپ، جاعدايدى ايتتى. ءسويتىپ، پايعامبارىمىزعا ادام جىبەرىپ، كەلۋىن سۇرايدى. ءابۋ ءتالىپ پەن باۋىرلارى دا دايىندىقتارىن جاساپ، پايعامبارىمىزبەن بىرگە بارادى.

حازىرەتى حاديشا بۇل قۇتتى وقيعا ءۇشىن ءۇيىن بەزەندىردى. وسى كۇننىڭ قۇرمەتىنە بارلىق اشەكەي بۇيىمدارىن قىزمەتشىلەرىنە سىيلادى. سوسىن ولارعا ازاتتىق بەردى، پايعامبارىمىز حاديشا حانىمنىڭ ۇيىنە كوكەلەرىمەن بىرگە كەلدى. ءابۋ ءتالىپ: «جاراتۋشىمىزعا شۇكىرشىلىك، ءبىزدى يبراھيم الەيھيسسالامنىڭ ۇرپاعىنان جانە ءيسمايلدىڭ تەگىنەن تاراتتى. ءبىزدى ءبايتۋللاھتىڭ قورعاۋشىسى ەتتى. ادامداردىڭ قىبلاسى جانە الەمدەر تاۋاپ ەتەتىن سول قاسيەتتى ورىندى، بارلىق جاماندىقتان قورعاعان حارامى ءشاريفتى بىزگە سىيلادى. باۋىرىم ابدۋللاھتىڭ ۇلى مۇحاممەد قۇرايشتىقتاردىڭ كەز كەلگەنىنەن ۇستەم كەلەتىن جىگىت. مال-مۇلكىنىڭ از ەكەنى راس، ءبىراق مال-مۇلىك باستى نارسە ەمەس. ويتكەنى مال-مۇلىك كولەڭكە سەكىلدى، قولدان-قولعا ءوتىپ كەتە بەرەدى. نەمەرە ءىنىمنىڭ اتاعى، ۇستەمدىگى بارىڭىزگە ءمالىم. ەندى حاديشا بينتي ءحۋۋايليدتى قالىڭدىققا سۇراپ وتىر. قانشا ءماھر سۇرايسىز؟ انت ەتەمىن مۇحاممەدتىڭ مارتەبەسى جوعارى» دەدى. ءۋاراقا بين ءناۋفال بۇل سوزدەردى راستادى. ءبيبى حاديشانىڭ كوكەسى امر بين ءاساد: «كۋاگەر بولىڭدار، حاديشا بينتي ءحۋۋايليدتى مۇحاممەد الەيھيسسالامعا قالىڭدىققا بەردىم» دەدى. وسىلايشا، نەكە كەلىسىمى اياقتالدى.

ءبىر ريۋايات بويىنشا ءماھر 400 مىسقال التىن، ءبىر ريۋايات بويىنشا بەس ءجۇز ديرحام، تاعى ءبىر ريۋايات بويىنشا 20 تۇيە دەپ ايتىلعان. ءابۋ ءتالىپ تويعا ارناپ ءبىر تۇيە سويىپ، كوز كورىپ قۇلاق ەستىمەگەن توي جاسادى. ۇيلەنۋ ءراسىمى وتكىزىلدى. حازىرەتى حاديشا بارلىق دۇنيە-مۇلكىن پايعامبارمىزعا سىيلاپ: «بۇلاردىڭ بارلىعى سىزدىكى جانە سىزگە عانا لايىق. ال مەن سىزگە مۇقتاجبىن جانە مىندەتتىمىن» دەدى. حازىرەتى حاديشا بۇكىل ءومىرى بويى پايعامبارىمىزعا قىزمەت ەتىپ، ونىڭ كومەكشىسى بولدى. پايعامبارىمىزدىڭ بۇل وتباسىلىق ءومىرى حاديشا حانىم قايتىس بولعانعا دەيىن، جيىرما بەس جىلعا سوزىلدى. ونىڭ ون بەس جىلى پايعامبارلىق بىلدىرىلگەنگە دەيىن، ون جىلى بىلدىرىلگەننەن كەيىن بولاتىن. پايعامبارىمىز العاشقى ايەلى بولعان حازىرەتى حاديشانىڭ ءتىرى كەزىندە باسقا ەشكىممەن ۇيلەنگەن جوق. ەكى ۇل، ءتورت قىز، بارلىعى بولىپ التى بالا ءسۇيدى. ولار - قاسىم، زەينەپ، ءرۋقايا، ءۇممۇ گۇلسىم، فاتيما جانە ابدۋللاھ (تايب نەمەسە تاحير). پايعامبارلىعى بىلدىرىلگەننەن كەيىن ۇيلەنگەن حازىرەتى ءماريادان دا يبراھيم ەسىمدى ءبىر ۇلى بولعان.

باسقا ايەلدەرىنەن بالاسى بولعان جوق. زەينەپ - قىزدارىنىڭ ۇلكەنى بولاتىن. ەڭ كىشى قىزى فاتيما - اكەسىنىڭ ەڭ سۇيىكتى قىزى ەدى. حيجرەتتەن ون ءۇش جىل بۇرىن دۇنيەگە كەلدى. ەر بالالارى كىشكەنە جاستارىندا قايتىس بولىپ، حازىرەتى فاتيمادان باسقا قىزدارىنىڭ بارلىعى وزىنەن بۇرىن دۇنيەدەن ءوتتى. حازىرەتى فاتيما پايعامبارىمىزدان التى ايدان كەيىن قايتىس بولدى. ول حازىرەتى اليمەن تۇرمىس قۇرعان بولاتىن. پايعامبارىمىز مۇحاممەد الەيھيسسالامنىڭ تەگى حازىرەتى فاتيما ارقىلى جالعاستى.

 پايعامبارىمىز حازىرەتى حاديشاعا (رادياللاھۋ انھا) ۇيلەنگەننەن كەيىن دە ساۋدامەن اينالىستى. تاپقان تابىسىنا قوناق كۇتىپ، جەتىمدەر مەن كەدەيلەرگە كومەك بەرەتىن.

ahlisunnet.kz