حالىقتىڭ كوشى-قونى جانە جۇمىسپەن قامتىلۋ ماسەلەلەرىنە قاتىستى زاڭ جوباسى تالقىلاندى - فوتو

استانا. قازاقپارات - بۇگىن ماجىلىستە حالىقتىڭ كوشى-قونى جانە جۇمىسپەن قامتىلۋى ماسەلەلەرىنە قاتىستى زاڭ جوباسى بويىنشا قۇرىلعان جۇمىس توبىنىڭ العاشقى وتىرىسى بولىپ ءوتتى.

ايتا كەتۋ كەرەك، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەملەكەت باسشىسىنىڭ 2014 -جىلعى 4 - مامىرداعى بەرگەن تاپسىرماسىنا وراي ازىرلەنگەن بولاتىن. ۇكىمەتتىڭ زاڭ جوباسىنا بەرگەن تۇسىندىرمەسىندە كوشى-قون زاڭناماسىنا وزگەرىستەر مەن تولىقتىرۋلار ەنگىزۋ جاھاندانۋ قاتەرلەرىنە جانە الەمدىك دامۋدىڭ تۇراقسىزدىعىنا، سونداي-اق مەملەكەتتىڭ ىشكى دامۋىنىڭ جاڭا كەزەڭىنە جانە الەۋمەتتىك- ەڭبەك قاتىناستارىن جاڭعىرتۋعا بايلانىستى بولىپ وتىرعانى اتاپ وتىلگەن.

زاڭ جوباسىن قابىلداۋ ماقساتى ەتنيكالىق، ىشكى كوشى-قون، شەتەلدىك جۇمىس كۇشىن تارتۋدى، زاڭنامالىق دەڭگەيدە ەتنيكالىق قازاقتاردىڭ كەلۋى مەن قونىستانۋىنىڭ ءبىرىڭعاي شارتتارىن قۇرۋدى، ولاردى قونىستاندىرۋ وڭىرىنە قاراي الەۋمەتتىك قولداۋدى قامتاماسىز ەتۋدى كوزدەيدى. سونىمەن قاتار ورالمانداردىڭ باسىم وڭىرلەردە قونىستانۋىن ىنتالاندىرۋ، ەڭبەك رەسۋرستارىن جۇمىس كۇشى ارتىق وڭىرلەردەن جۇمىس كۇشى از وڭىرلەرگە قايتا ءبولۋ، سونداي- اق ەلگە جوعارى بىلىكتى ماماندار تارتۋ سالالارىنداعى كوشى- قون ساياساتىن جەتىلدىرۋ قاجەت.

جۇمىس توبىنىڭ جەتەكشىسى، دەپۋتات گۇلنار سەيىتماعانبەتوۆا بۇل زاڭ جوباسىنىڭ ءبىزدىڭ قوعام ءۇشىن جانە كوشى- قون ماسەلەلەرىن رەتتەۋدە ماڭىزدى ەكەنىن العا تارتتى.

ءماجىلىستىڭ الەۋمەتتىك- مادەني دامۋ كوميتەتىنىڭ مۇشەسى، جۇمىس توبىنىڭ جەتەكشىسى گۇلنار سەيىتماعانبەتوۆا وتىرىسقا دەپۋتاتتار جانە مۇددەلى مينيسترلىكتەر مەن ۆەدومستۆو وكىلدەرى قاتىسىپ وتىرعانىن ايتىپ ءوتتى.

جۇمىس توبىنىڭ مۇشەلەرى زاڭ جوباسىن سالىستىرما كەستەگە ەنگەن باپتار بويىنشا جەكە- جەكە قارادى. بۇگىنگى كۇنگە دەيىن سالىستىرما كەستەگە سالالىق كوميتەتتەر مەن دەپۋتاتتار ۇسىنعان 140 تۇزەتۋ ەنگىزىلگەن.

جۇمىس توبىنىڭ وتىرىسىنا قاتىسقان ءماجىلىس دەپۋتاتتارى ۇسەنگەلدى مەدەۋوۆ، قۇتتىقوجا ىدىرىسوۆ، الماس تۇرتايەۆ، گۇلميرا يسيمبايەۆا، مايرا ايسينا، ولگا كيكولەنكو، نادەجدا پەتۋحوۆالار سالىستىرما كەستەگە ەنگىزىلگەن تۇزەتۋلەردى ساراپقا سالدى. دەپۋتاتتاردىڭ زاڭ جوباسىن تالقىلاۋدا جانە ۇسىنىستار بەرۋدە بەلسەندىلىك تانىتىپ وتىرعانىن اتاپ ءوتۋ قاجەت.

جۇمىس توبىنىڭ كەلەسى وتىرىسى الداعى اپتانىڭ بەيسەنبى كۇنى جالعاسىن تاباتىن بولدى.

اۆتور: ايدىن بايمەن