كەلىن اتا- ەنەسىنە قاراۋعا مىندەتتى مە؟

نۇر-سۇلتان. قازاقپارات - يسلامدا ايەل مەن ەرىنىڭ ءوزارا مىندەتتەرى ايتىلعانىمەن، بۇل تۋرالى ناقتى ۇكىم كەزدەسپەيدى.

دەسەك تە، بۇنىڭ جاۋابىن تۋىستىق قاتىناستار، ءبىر-ءبىرىن باقىتتى ەتۋ تۇرعىسىنداعى نەگىزدەردەن تابامىز.

ەڭ اۋەلى باسىن اشاتىن ماسەلە، جاس كەلىنگە ەشكىم كۇشتەپ اتا- ەنەگە قىزمەت ەتكىزە المايدى. بۇل ءوزارا تۇسىنىستىكپەن، كوڭىلمەن اتقارىلاتىن ءىس. ەرىنىڭ باقىتىن ءوز باقىتىنا بالاعان ايەلدەر قاۋىمى قاشان دا اتا- ەنەسىنىڭ كوڭىلىن تابۋعا كۇش سالادى.

البەتتە، ەر ازاماتتىڭ باقىتى اكە- شەشەسىنىڭ قاس- قاباعىنا قارايلاعان اسىل جارى ەكەنى ءسوزسىز.

جاستار جاعدايعا قاراي كەيدە ەنشى الىپ، بولەك شىعىپ جاتادى، كەيدە اتا- ەنەمەن بىرگە تۇرادى. مىنە، وسى كەزدە كەلىننىڭ اقىلى مەن سابىرى، ادامگەرشىلىك مىنەزى كوبىرەك سىنعا تۇسەدى. جاس كەلىنگە ەرىنىڭ دۇنيەگە كەلۋىنە كىمدەردىڭ سەبەپكەر ەكەنىن ۇمىتپاعان ابزال. ەرىن اياققا تۇرعىزىپ، وسى كۇنگە دەيىن اسىراپ باعىپ، ءتۇن ۇيقىسىن ءتورت بولگەن جانداردىڭ ەڭبەگى قالايشا ەسكەرۋسىز قالماق؟ تارازىلاي بىلگەن نازىك جاندىلار ءۇشىن اتا- ەنەنىڭ قاس قاباعىنا قاراپ، قۇرمەتتەۋدىڭ سىرى وسىندا.

سوندىقتان اقىلدى جار مىندەتتى تۇردە ەرىنىڭ اتا- اناسىن ءوزىنىڭ اكە- شەشەسىندەي قابىلدايدى. كەلىن ءوز قۇقىعىن العا تارتىپ: «دىندە اتا- ەنەگە قىزمەت كورسەتۋ مىندەتتەلمەگەن» دەپ كيكىلجىڭ شىعارسا، ەرىنىڭ كوڭىلىنە قاياۋ تۇسەرى انىق. اللانىڭ رازىلىعى ەرىنىڭ ريزالىعىنا تىكەلەي قاتىستى ەكەنىن بىلگەن ءاربىر ايەل ونى قالاماسا كەرەك.

كەلىن اتا- ەنەگە قۇرمەتىنەن جاڭىلماسا، ەرى دە كەلىنشەگىنىڭ اكە- شەشەسىمەن جاقسى سىيلاستىقتا بولسا، ودان اسقان باقىت بار ما؟

ءدىنىمىز ۇلكەندەرگە قۇرمەت كورسەتۋگە شاقىرادى. كەلىننىڭ اتا- ەنەگە قاراۋى كەلگەن جاعىنا سۇيكىمىن ارتتىرىپ، كۇيەۋىمەن تاتۋ تۇرۋىنا سەبەپ. بۇدان بولەك، بۇل ءىستىڭ ادامي جاعى، مەيىرىم مەن جاناشىر جاعى دا جوق ەمەس. وتباسىنداعى ۇلكەن كىسىلەرگە قۇرمەت جاساۋ سول وتباسىنىڭ باقىتىنا دا سەبەپ. كەرى جاعدايدا ول وتباسىندا كيكىلجىڭدەر ورىن الارى ءسوزسىز. ارداقتى پايعامبارىمىز (س. ا. ۋ. ): «ۇمبەتىمنىڭ قاريالارىنا قۇرمەت كورسەتكەندەر، ماعان دا قۇرمەت كورسەتكەنى» دەگەن.

قۇرانعا ۇڭىلسەك: «جاقسىلىقتىڭ قايتارىمى جاقسىلىق قانا» دەگەن اياتتى كورەمىز (راحمان سۇرەسى، 60). ءيا، ادام ومىرىندە ءار جاسالعان جاقسىلىق تەككە كەتپەيدى. مىندەتتى تۇردە ءبىر كۇنى ادامنىڭ الدىنان شىعادى.

«اتاڭا نە ىستەسەڭ، الدىڭنان سول شىعادى» دەمەكشى، بۇگىن اتا- ەنەسىنە قاراعاندار ەرتەڭ ءوز بالالارىنان قۇرمەت، جاقسىلىق كورەدى. بۇل ەرگە دە، ايەلگە دە ورتاق. ايەلى ءۇشىن كۇيەۋىنىڭ اتا- اناسى، ەرى ءۇشىن ايەلىنىڭ اتا- اناسى اكە- شەشە ۇكىمىندە. سوندىقتان ول كىسىلەرگە بارىنشا قۇرمەت كورسەتۋ كەرەك.

مىناداي ءبىر وقيعا ايتىلادى.

بىردە ۇيلەنگەندەرىنە ءبىرشاما ۋاقىت بولعاندا، كەلىنشەگى كۇيەۋىنە: «ەندى سەنىڭ اكە- شەشەڭە قاراعىم كەلمەيدى» - دەپتى. ايتقانىنداي كۇندە ءتۇرلى مىنەز شىعارىپ، كۇيەۋىن مەزى ەتە باستاپتى. سودان كۇيەۋى: «اقىرى مەنىڭ اكە- شەشەمدى سىيلامايتىن بولساڭ، وندا ءبىر بولمەنى بوسات» - دەپتى.

ايەلى: «نە ءۇشىن؟» دەگەندە: - قايتەم ەندى؟ اكە- شەشەمە قارايتىن باسقا بىرەۋمەن ۇيلەنەيىن؟ - دەپتى. سوندا ايەلى ساسىپ قالىپ:

- سەن دە ءازىلدى تۇسىنبەيدى ەكەنسىڭ. مەن قالجىڭداپ ءجۇرمىن عوي. ارينە، ءوزىم قارايمىن. ول كىسىلەر ماعان ءوز اكە- شەشەمدەي ەمەس پە؟ - دەگەن ەكەن.

سوندىقتان ماسەلەنى ءدال وسىعان دەيىن ۋشىقتىرماعان دۇرىس.

Islam.kz