جالاقىنىڭ ازدىعىنان يمامدار مەشىتتەردە جۇمىس ىستەۋدەن باس تارتۋدا

استانا. قازاقپارات - اقتوبەدەگى مەشىتتەردى باسقارىپ وتىرعان يمامداردىڭ ءبىلىمى تالاپقا ساي ەمەس. ءدىني قىزمەتكەرلەردىڭ وتىز پايىزى جوعارى ءبىلىم الماعان، تەك ەكى ايلىق كۋرستى عانا ءتامامداعان.

جالاقىنىڭ ازدىعىنان يمامدار مەشىتتەردە جۇمىس ىستەۋدەن باس تارتۋدا. ولاردىڭ كوپشىلىگى شالعاي اۋداندار مەن اۋىل مەشىتتەرىندە قىزمەت ەتەدى ەكەن. يمامادار جالپى اقتوبەدەگى ءدىني احۋالدىڭ دا ءالى كۇنگە دەيىن تۇراقسىز ەكەنىن ايتادى. «سوندىقتان، اعارتۋ جۇمىستارىن بارىنشا كۇشەيتۋ كەرەك»، - دەيدى.

«يسلام شاريعاتتارى تەرەڭ ۇيرەتىلمەگەن، جالپى ۇيرەتىلگەن مولدالار بار. ولار الماتى قالاسىنداعى يمامدار ءبىلىمىن جەتىلدىرۋ كۋرسىنان وتەدى. ودان وزگە اقتوبە قالاسىندا دا ءۇش جىلدان بەرى وسىنداي ەكى ايلىق كۋرس وتكىزەمىز»، - دەيدى اقتوبە وبلىستىق «نۇر عاسىر» مەشىتىنىڭ باس يمامى ءابدىمۇتالى داۋرەنبەكوۆ.

دەسە دە مەشىت قىزمەتكەرلەرىنە جوعارى وقۋ ورنىن ءبىتىرۋ كەرەك دەگەن تالاپ قويۋ مۇمكىن بولماي وتىر. ايتا كەتەيىك، ەلىمىز بويىنشا تەك وسى اقتوبەدە عانا ءدىني قىزمەتكەرلەرگە جالاقى تولەنەدى ەكەن. شۇبارشىداعى وقيعادان كەيىن وبلىس باسشىلارى يمامداردى قولداۋ ماقساتىندا وسىنداي شەشىمگە كەلگەن ەدى.

سونداي-اق اقتوبە وبلىسىندا بىلتىر دىنگە بەت بۇرعان وقۋشىلار سانى 7,2 پايىزعا كوبەيىپتى. بۇل تۋرالى ارنايى ەسەبىندە اقتوبە وبلىستىق ءبىلىم باسقارماسىنىڭ باسشىسى جانات سامۇراتوۆا مالىمدەگەن بولاتىن. ونىڭ ايتۋىنشا، قازىر وبلىس مەكتەپتەرىندە ءدىن جولىن ۇستايتىن 357 بالا بار.

7- كانال