يۋنەسكونىڭ مادەني مۇرالارى تىزىمىنە «ايتىستى»، «قىمىزدى»، «بۇركىتپەن اڭ اۋلاۋدى» ەنگىزۋ جوسپارلانىپ وتىر

استانا. قازاقپارات - يۋنەسكونىڭ ماتەريالدىق ەمەس مادەني مۇرالارى تىزىمىنە «ايتىستى»، «ناۋرىزدى»، «قىمىزدى»، «بۇركىتپەن اڭ اۋلاۋدى» ەنگىزۋ جوسپارلانىپ وتىر.

بۇل تۋرالى ق ر مادەنيەت جانە سپورت مينيسترلىگىنىڭ القا ماجىلىسىنەن كەيىن مادەنيەت جانە ونەر ىستەرى دەپارتامەنتىنىڭ ديرەكتورى اقتوتى رايىمقۇلوۆا ءمالىم ەتتى.

«بىردەن ءبىر جەتىستىگىمىز - «قازاقتىڭ ءداستۇرلى دومبىرا كۇي ونەرى» جانە قىرعىزستانمەن بىرلەسىپ دايىنداعان «كيىز ءۇيدى جاساۋدىڭ ءداستۇرلى بىلىمدەرى مەن داعدىلارى» اتالىمدارى ادامزاتتىڭ ماتەريالدىق ەمەس مادەني مۇراسىنىڭ كورنەكى تىزىمىنە ەنگىزىلدى.

بۇل - يۋنەسكونىڭ ماتەريالدىق ەمەس مادەني مۇرالارى تىزىمىنە ەنىپ وتىرعان العاشقى مۇرالارىمىز. ەندىگى كەزەكتە «ايتىس»، «ناۋرىز»، «قىمىز»، «بۇركىتپەن اڭ اۋلاۋ»، جانە باسقا دا ۇلتتىق ونەرلەرىمىزدى ەنگىزۋ جوسپارلانىپ وتىر»، - دەدى دەپارتامەنت باسشىسى.

سونىمەن قاتار ا. رايىمقۇلوۆا «تاريحي- مادەني مۇرا» ۇلتتىق ستراتەگيالىق جوبا اياسىندا 31 ەسكەرتكىشتە جاڭعىرتۋ جۇمىستارى جۇرگىزىلىپ، ونىندا جۇمىس تولىق اياقتالعانىن، 7 ءىرى تاريحي نىسانداردا ارحەولوگيالىق زەرتتەۋلەر، 4 عىلىمي قولدانبالى زەرتتەۋ جۇمىستارى جۇرگىزىلگەنىن اتاپ ءوتتى.

«جىلدىڭ ايتۋلى وقيعاسى - قازاقستان ايماعىنداعى ۇلى جىبەك جولىنىڭ جەتىسۋ بولىگىندەگى سەگىز ەسكەرتكىشى، ياعني - تالعار، قايالىق، قارامەرگەن، اقتوبە (بالاساعۇن)، ورنەك، قۇلان، قۇستوبە جانە اقىرتاس كەشەندەرى يۋنەسكونىڭ بۇكىلالەمدىك ترانسشەكارالىق مۇرالار اتالىمىنا ەنىپ، يۋنەسكو تىزبەسىندەگى قازاقستان ەسكەرتكىشتەرىنىڭ قاتارىن تولتىردى»، - دەدى ول.

اۆتور: رۋسلان عابباسوۆ