تۇركيانىڭ دامۋ ءمينيسترى: قازاقستان عالامدىق داعدارىس جاعدايىندا دامۋ قارقىنىن جولعالتقان جوق

استانا. قازاقپارات - «بۇكىل الەمدى ەكونوميكالىق داعدارىس قىسپاققا العان شاقتا، قازاقستان «نۇرلى جول» باعدارلاماسى ارقىلى قيىندىقتاردى ابىرويمەن ەڭسەرەدى.

ويتكەنى قازاق ەلى وتاندىق ەكونوميكانىڭ الەۋەتىن ارتتىرۋ بويىنشا العى شارتتاردىڭ بارلىعىن ۋاقتىلى قولعا الدى» دەپ ەسەپتەيدى تۇرىك ساراپشىلارى.

ال تۇركيانىڭ دامۋ ءمينيسترى دجيەۆدەت يىلماز ەلىمىزدىڭ داعدارىسقا قارسى قابىلدانعان باعدارلاماسىنا قىزىعۋشىلىق تانىتىپ وتىرعانىن جاسىرمادى. بۇگىندە رەسمي انكارا ەل ىشىندە ەسەپسىز وسكەن ينفلياتسيا مەن جۇمىسسىزدىق ماسەلەلەرىنە الاڭداۋشىلىق بىلدىرۋدە. ويتكەنى بۇل ەلدە ەڭبەككە قابىلەتتى 3 ميلليونعا جۋىق ادام جۇمىس تابا الماي، سەندەلىپ ءجۇر. كەشە تۇركيانىڭ دامۋ ءمينيسترى دجيەۆدەت يىلماز ەلشى جانسەيىت تۇيمەبايەۆپەن كەزدەسىپ، ەلىمىزدىڭ داعدارىسقا قارسى قابىلداعان باعدارلاماسىمەن كەڭىنەن تانىستى.

باس قوسۋدا مينيستر يىلماز قازاقستاننىڭ ەكونوميكاسى باسەكەگە قابىلەتتى ەكەندىگىن اتاپ ءوتتى.

دجيەۆدەت يىلماز، تۇركيانىڭ دامۋ ءمينيسترى:

- قازاقستان تىنىشتىق پەن اۋىزبىرشىلىكتىڭ ارقاسىندا تۇراقتى تۇردە دامۋدا. الەمدە مۇناي باعاسىنىڭ قۇلدىراۋى، ەنەرگەتيكالىق رەسۋرستاردى ءوندىرۋشى ەل رەتىندە، كەرى ىقپال ەتتى، بىلەمىز. دەگەنمەن قازاقستان داعدارىسقا توتەپ بەرەر مول تاجىريبەسىمەن بۇل ۋاقىتشا قيىندىقتاردى دا ابىرويمەن ەڭسەرەتىنىنە سەنىمدىمىن. ويتكەنى عالامدىق داعدارىس جاعدايىندا دامۋ قارقىنىن جولعالتپاعان ەكى مەملەكەت بار. ونىڭ ءبىرى تۇركيا بولسا، ال ەكىنشىسى -  قازاقستان.

دەگەنمەن تاياۋ شىعىستاعى تىنىشسىزدىق پەن ۋكراينا داعدارىسى تۇركياعا دا وڭاي سوقپاي تۇر. سونىڭ سالدارىنان بۇل ەلدەرمەن ساۋدا اينالىمى باسەڭدەپ، وتكەن جىلعى ۇلتتىق تابىس مولشەرى 60 ميلليارد ا ق ش دوللارىنا كەمىدى. «داعدارىس دەندەپ الماۋى ءۇشىن ءار مەملەكەت «وزىنىكى دەگەندە، وگىز قارا كۇشىن» تانىتۋى ءتيىس» دەپ ەسەپتەيدى تاسام تۇرىك- ازيا ستراتەگيالىق زەرتتەۋلەر ورتالىعىنىڭ ءتوراعاسى سۇلەيمان شەنسوي.

سۇلەيمان شەنسوي، تاسام ستراتەگيالىق زەرتتەۋلەر ورتالىعىنىڭ ءتوراعاسى:

- دۇنيەجۇزىنىڭ بۇكىل ەلى المالى- توكپەلى زاماندى باسىنان وتكەرۋدە. ەنەرگەتيكالىق رەسۋرستارعا الەمدىك باعانىڭ كۇرت ارزانداۋى ەكونوميكالىق داعدارىستى قوزدىردى دەپ بىلەمىن. بۇل ۋاقىتتا بايبالام سالۋدىڭ ەش قاجەتى جوق. قايتا، كەرىسىنشە، وسى ارالىقتا ۇلتتىق ەكونوميكانى ساقتاپ قالۋدىڭ بارلىق شاراسىن جاساۋ قاجەت. مەنىڭ جەكە پىكىرىم، مۇناي مەن گازعا باعانىڭ ءتۇسۋى قازاقستان ءۇشىن ۇلكەن مۇمكىندىك. نەگە دەسەڭىز، وتاندىق ەكونوميكا «گوللاند اۋرۋىنا» شالدىقپاي، مول قاراجات ءتيىستى سالالاردىڭ دامۋىنا جۇمسالادى. قازىر قازاقستان ۇكىمەتىنىڭ شاعىن جانە ورتا بيزنەستى ىنتالاندىرىپ، اۋىلشارۋاشىلىعى مەن كولىك ينفراقۇرىلىمىنا ايرىقشا باسىمدىق بەرۋى وتە ورىندى شەشىم.

«نۇرلى جول» جولداۋى جاريالانعان بەتتە ول كىتاپشا بولىپ تۇرىك تىلىنە دە اۋدارىلىپ جارىق كوردى. سول ارقىلى تۇركيانىڭ زيالى قاۋىم وكىلدەرى مەملەكەتىمىزدىڭ الداعى جوسپارلارىمەن كەڭىنەن تانىسىپ ۇلگەردى. اسىرەسە تۇرىكتىڭ ساراپشى ماماندارى باقۋات كۇندە قارجىنى شاشپاي- توكپەي «التىن قورعا» جيناقتاپ، قازىر قاجەتىنە جاراتىپ وتىرعان قازاقستاننىڭ ستراتەگيالىق جوسپارىنا وڭ باعا بەرۋدە.

24.kz