شەتەلدەگى ەتنيكالىق قازاقتار توتەنشە جاعدايعا تاپ بولسا، ولاردى قازاقستانعا قابىلداۋدىڭ تەتىگى بولۋى ءتيىس - ا. سمايىل
بۇل تۋرالى بۇگىن ماجىلىستە دەپۋتات الدان سمايىل وسىنداي ۇسىنىس ايتتى.
ەسكە سالايىق، ماجىلىستە «ق ر كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى وتكەن ەدى.
«قازاقتار تىعىز ورنالاسىپ، تۇرىپ جاتقان شەت ەلدەردە ەكونوميكالىق داعدارىس بولسا، كۇنكورىس ابدەن تومەندەپ، قانداستارىمىزدىڭ تۇرمىس-تىرشىلىگىنە قاۋىپ تونسە نەمەسە تابيعي اپاتتار ورىن السا، ەتنيكاارالىق قاقتىعىستار ورىن السا قالاي بولادى؟ مۇنداي جاعدايدا ەتنيكالىق قازاقتار وزدەرىنىڭ تاريحي وتانى قازاقستانعا اعىلۋى ابدەن مۇمكىن. ولاردىڭ بارار باسقا جەرى جوق.
«جامان ايتپاي جاقسى جوق»، وسىنداي جاعداي تۋسا ءبىز ەتنيكالىق قازاقتاردى قالاي قابىلدايمىز؟ ولارعا «الدىمەن ورالمان مارتەبەسىن الۋىڭ كەرەك» دەپ كەۋدەسىنەن كەرى يتەرەمىز بە؟ جوق الدە ولاردى تۇتاستاي قابىلداۋعا قازاقستاننىڭ ءتارتىبى بولا ما؟ وسىنى زاڭ جوباسىندا قاراستىرۋعا ءتيىسپىز»، - دەدى الدان سمايىل.
ونىڭ ايتۋىنشا، شەتەلدە تۇرىپ جاتقان قازاقتاردىڭ باسىنا كۇن تۋسا ولاردى قازاقستاندا قابىلداۋدىڭ جۇيەسى زاڭ ارقىلى كورىنىس تابۋى شارت.
ءوز كەزەگىندە دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى داۋلەت ارعىندىقوۆ زاڭ جوباسىمەن جۇمىس بارىسىندا اتالعان ماسەلەنى قاراستىرۋعا بولاتىنىن اتاپ ءوتتى.
اۆتور: قانات مامەتقازى ۇلى
