اقمولا وبلىسىندا ءۇش كۇندە مىڭعا جۋىق ادام جول ەرەجەسىن بۇزدى
باسپا ءسوز قىزمەتىنىڭ مالىمەتىنشە، اقمولا وبلىسىندا جۇرگىزىلگەن «ماس جۇرگىزۋشى» جەدەل پروفيلاكتيكالىق ءىس-شارا بارىسىندا جول قاۋىپسىزدىگى ەرەجەسىن بۇزۋدىڭ 954 دەرەگى انىقتالعان.
ونىڭ ىشىندە، ماس كۇيىندە كولىك جۇرگىزگەن 49 ادام بار جانە 271 جۇرگىزۋشى جىلدامدىقتى اسىرىپ، 238 ى قاۋىپسىزدىك بەلدىگىن تاپپاعان. سونىمەن قاتار، رۋلدە ۇيالى تەلەفونمەن سويلەسكەن 99 ادام ۇستالدى.
«جول- كولىك وقيعالارىنىڭ الدىن الۋ جانە اپاتتىلىق دەڭگەيىن تۇراقتاندىرۋ ماقساتىندا، وبلىس اۋماعىندا «ماس جۇرگىزۋشى» جەدەل- پروفيلاكتيكالىق ءىس-شاراسى ۇيىمداستىرىلدى. جول قوزعالىسىن قاداعالاۋدى جۇزەگە اسىرۋ ءۇشىن جول پوليتسياسى قىزمەتكەرلەرى جاپپاي جۇمىلدىرىلدى، ءۇش كۇن ىشىندە 1193 ادام قىزمەتكە شىقتى، سونداي-اق ءىس-شارانى جۇرگىزۋ ءۇشىن ىشكى ىستەر ورگاندارىنىڭ باسقا دا قىزمەتتەرىنىڭ 68 قىزمەتكەرى جۇمىلدىرىلدى، سونىڭ ىشىندە 252 ۋچاسكەلىك پوليتسيا ينسپەكتورى بار»، - دەلىنگەن حابارلامادا.
ەسكە سالا كەتەيىك، بۇعان دەيىن سولتۇستىك قازاقستان وبلىسىندا جول-پاترۋل پوليتسياسىنىڭ قىزمەتكەرلەرى ءبىر تاۋلىكتە 19 ماس جۇرگىزۋشىنى ۇستاعانى حابارلانعان بولاتىن. سونىمەن قاتار، قاۋىپسىزدىك بەلبەۋىن تاقپاي جۇرگەن 77 جۇرگىزۋشىگە حاتتاما تولتىرىلدى. 75 جۇرگىزۋشى رۋلدە وتىرىپ، ۇيالى تەلەفون ارقىلى سويلەسكەنى ءۇشىن اكىمشىلىك جاۋاپكەرشىلىككە تارتىلدى.
