بەرليندىك مۇسىلماندار قۇران كوشىرمەلەرىن تەگىن تاراتتى

استانا. قازاقپارات - بەرلين قالاسىنىڭ مۇسىلمان جاستارىنان قۇرالعان بەلسەندى توپ قاسيەتتى قۇران كارىمنىڭ نەمىس تىلىنە اۋدارىلعان كوشىرمەلەرىن تەگىن تاراتۋدى قولعا الدى، دەپ حابارلادى www.muslim.kz.

بۇل ناۋقان يسلام ءدىنىنىڭ شىنايى بەت-بەينەسىن تانىتىپ، ونىڭ لاڭكەستىك پەن زورلىق-زومبىلىقتان ادا مەيىرىم ءدىنى ەكەنىن كورسەتۋگە باعىتتالعان.

قاسيەتتى قۇران تاراتۋ اكسياسى جاقىن كۇندەرى فرانكفۋرت، گامبۋرگ جانە بونن قالالارىندا جالعاسىن تاپپاق. بۇل قادام سوڭعى ۋاقىتتارى ەۋروپادا كوتەرىلىپ كەلە جاتقان انتييسلامدىق كوزقاراستارعا قارسى جاسالىپ وتىر.

PEGIDA دەپ اتالاتىن انتييسلامدىق قوزعالىس وتكەن جىلى بىرنەشە ميتينگ ۇيىمداستىرىپ، «باتىستىڭ يسلاميلانۋىنا» قارسى شارالار وتكىزگەن بولاتىن. وسى سەبەپتى دە، نەمىس جاستارى بەيبىت تۇردە ولارعا قارسى كۇرەس جۇرگىزۋ كەرەك دەپ ەسەپتەيدى.