قازاقستاندا تۇڭعىش جارتىلاي سينتەتيكالىق ماتا ءوندىرۋ فابريكاسى اشىلدى - فوتو
ەل ەكونوميكاسىن دامىتۋدىڭ قوزعاۋشى كۇشى بولىپ وتىرعان ۇدەمەلى يندۋستريالىق- يننوۆاتسيالىق دامۋ مەملەكەتتىك باعدارلاماسى وسى ۋاقىت ارالىعىندا قازاقستاننىڭ وندىرىستىك قۋاتىن ارتتىرىپ، الەۋمەتتىك احۋالىن ءبىر سەرپىلتىپ تاستاعانى انىق. جاڭادان اشىلعان جوبالار حالىقتىڭ الەۋمەتتىك جاعدايىن جاقسارتىپ، جاڭا جۇمىس ورنىمەن قامتۋعا سەپتىگىن تيگىزدى. سونداي كاسىپورىنداردىڭ ءبىرى - ساپاسى جوعارى وتاندىق ماتا شىعاراتىن «ساۋلە» تىگىن- تريكوتاج فابريكاسى.
جاڭا فابريكانىڭ ىسكە قوسىلۋىنا «قازاقستاندى جاڭاشا يندۋستريالاندىرۋ: 2014 -جىلدىڭ جانە ءبىرىنشى بەسجىلدىقتىڭ قورىتىندىلارى» اتتى جالپى ۇلتتىق تەلەكوپىر بارىسىندا ق ر پرەزيدەنتى نۇرسۇلتان نازاربايەۆ رۇقسات بەرگەن بولاتىن.
جاڭا ءوندىرىس ورنىنىڭ العا قويعان ماقساتتارى تۋرالى «ساۋلە» تىگىن- تريكوتاج فابريكاسىنىڭ ديرەكتورى داۋرەن الىمبەكوۆ اڭگىمەلەپ بەردى.
- ءوندىرىس ورنى تۋرالى كەڭىرەك ايتىپ بەرسەڭىزدەر.
- كاسىپورىن 1999 -جىلى قۇرىلعان. 2 فابريكا جۇمىس جاساپ تۇر. ءبىرى - الماتىدا ساپاسى جوعارى ماتا وندىرەتىن فابريكا بولسا، ەكىنشىسى سول شيكىزاتتى وڭدەپ، كيىم تىگەتىن فابريكامىز شىمكەنتتە ورنالاسقان. نەگىزگى باعىتىمىز اسكەري، ارنايى، جۇمىس كيىمدەرىن تىگۋ جانە سولارعا ارنالعان ماتا ءوندىرۋ. الماتىداعى ماتا فابريكاسى وتكەن جىلى اشىلدى. مۇندا جىلىنا 1 ميلليون مەتر ماتا وندىرىلەدى. شىمكەنتتەگى تىگىن فابريكاسىنىڭ وندىرىستىك قۋاتى - جىلىنا 300 مىڭ دانا ءونىم.
- مەملەكەت تاراپىنان قانداي قولداۋلار بولدى ؟
- ءبىزدىڭ بيزنەسىمىزدىڭ قۇرىلۋىنا، ورىستەۋىنە مەملەكەتىمىزدىڭ كورسەتكەن قولداۋى كوپ. ۇدەمەلى يندۋستريالىق- يننوۆاتسيالىق دامۋ مەملەكەتتىك باعدارلاماسى اياسىندا قولعا الىنعان «بيزنەستىڭ جول كارتاسى-2020» باعدارلاماسى بويىنشا «دامۋ» كاسىپكەرلىكتى قولداۋ قورىنان دەمەۋقارجىعا يە بولدىق. «دامۋ» قورى بانكتەن الىنعان نەسيەنىڭ پايىزدىق كورسەتكىشىنىڭ جارتىسىن وزدەرى قارجىلاندىردى.
- ءوندىرىس بارىسىندا قانداي يننوۆاتسيالىق تەحنولوگيالاردى قولداناسىزدار؟
- تىگىن فابريكاسىندا وندىرىستىك زاماناۋي تەحنولوگيالاردى قولدانامىز. ماتا جاساۋ فابريكاسىندا قازىرگى تاڭدا قازاقستانداعى - ءبىرىنشى، ورتالىق ازياداعى ەكىنشى كاسىپورىن رەتىندە ارالاس (جارتىلاي سينتەتيكالىق) ماتا جاساۋدى يگەرىپ جاتىرمىز. ادام رەسۋرستارىن باسقارۋدا يننوۆاتسيالىق تەحنولوگيالاردىڭ ءبىرى - جاپوندىق كايدزەن ادىستەمەسىن قولدانامىز. اتالعان ادىستەمە جاپونيادا سوعىستان كەيىنگى جىلداردا كەڭىنەن پايدالانىلىپ، «تويوتا» سياقتى كومپانيالاردىڭ قارقىندى دامۋىنا ىقپال ەتكەن. كەيىننەن بۇل پرينتسيپ امەريكا، ەۋروپا كورپوراتسيالارىندا دا پايدالانىلدى. ياعني، ءتارتىپ پەن تازالىققا نەگىزدەلگەن وندىرىستە ءار ادامدى كاسىبي تۇرعىدان جەتىلدىرۋ - باستى ماقسات.
- يندۋستريالىق- يننوۆاتسيالىق دامۋدىڭ ەكىنشى بەسجىلدىعىنا قۇرعان جوسپارلارىڭىزبەن بولىسە وتىرساڭىز.
- جاقىن ارادا تريكوتاج ماتا جاساۋ ءوندىرىسىن اشامىز. سونداي- اق، شىعارىلاتىن ماتالاردىڭ تۇرلەرىن كوبەيتۋ جوسپاردا بار. ءوندىرىستىڭ كەڭەيۋى قوسىمشا 100 جاڭا جۇمىس ورنىن اشۋعا مۇمكىندىك بەرمەك. وسى ماقساتقا جەتۋ ءۇشىن تاعى دا «بيزنەستىڭ جول كارتاسى-2020» باعدارلاماسى بويىنشا قوسىمشا نەسيە الۋ ويدا بار.
- كاسىپورىندا قانشا ادام جۇمىس ىستەيدى؟
- ءبىزدىڭ كاسىپورىندا 195 ادام جۇمىس ىستەيدى، ولاردىڭ باسىم بولىگى، ناقتىراق ايتقاندا 170 ءى ايەلدەر.
اۆتور: گۇلميرا عوسمانالي 
