ەلىمىزدەگى ءبىرقاتار جوعارعى وقۋ ورنىنىڭ ءبىلىم ساپاسى سىن كوتەرمەيدى

استانا. قازاقپارات - جەكەمەنشىك ءبىلىم وردالارىنىڭ دەنى تابىس تابۋ ءۇشىن ۇلتتىق ءبىرىڭعاي تەستىلەۋدەن سۇرىنگەن تۇلەكتەردى قابىلداپ جاتىر.

بۇگىن سەنات وتىرىسىندا مۇرات باقتيار ۇلى وسىنداي ماسەلە كوتەرىپ، دەپۋتاتتىق ساۋال جولدادى.

سەناتوردىڭ ايتۋىنشا، ەلىمىزدە 130 مىڭ ادامعا ءبىر جوعارعى وقۋ ورنىنان كەلسە، دامىعان ەۋروپا مەملەكەتتەرىندە بۇل كورسەتكىش بىزدىكىنەن 2,5 ەسەگە از. بۇل ازداي ىشكى سۇرانىستى ەسەپكە الماي، كادر دايىنداۋ ماسەلەسى جيىلەپ كەتكەن.

ەلىمىزدە جىل سايىن 10 مىڭداي ازامات نارىققا قاجەت ەمەس ماماندىقتىڭ يەسى اتانادى ەكەن. قازىر جاستاردىڭ 17 پايىزى عانا تەحنيكالىق كاسىپتىك ءبىلىم الىپ جاتىر دەگەن دەپۋتات بۇل ولقىلىقتى شەشۋ ءۇشىن وسى سالاعا جاۋاپتى مينيسترلىككە جىل سايىن قاجەت مامانداردىڭ ءتىزىمىن جاساۋدى تاپسىردى.

ال وقۋ ورىندارى وسى سۇرانىستاردى ەسكەرە وتىرىپ ستۋدەنت قابىلداۋ قاجەت.

مۇرات باقتيار ۇلى، ق ر پارلامەنتى سەناتىنىڭ دەپۋتاتى:

- قازىرگى ۋاقىتتا ەلىمىزدەگى ج و و- نىڭ 82 سى ۋنيۆەرسيتەت مارتەبەسىنە يە بولىپ وتىر ەكەن. سوندىقتان 10 مىڭنان تومەن ستۋدەنتتەرى بار ج و و ۋنيۆەرسيتەت مارتەبەسىنەن ايىرىپ، پروفيلدىك باعىتتاعى ينستيتۋت نە اكادەميا ستاتۋسىنا ءتۇسىرۋ تەتىكتەرىنەن زاڭداستىرۋ قاجەت دەپ ەسەپتەيمىن. ەلباسىمىزدىڭ ساپاسىز ءبىلىم بەرەتىن ج و و سانىن قىسقارتۋ تۋرالى بەرگەن تاپسىرماسىنا ءبىلىم جانە عىلىم مينيسترلىگى قۇلىقسىزدىق تانىتىپ وتىرعان سياقتى. ويتكەنى كوپتەگەن ساپاسىز ءبىلىم بەرەتىن جەكەمەنشىك ج و و- نىڭ يەلەرى مەملەكەتتىك ج و و رەكتورلارى نە استانادا وتىرعان جوعارى لاۋازىم يەلەرى بولىپ كەلەتىنى جاسىرىن ەمەس.
سونىمەن قاتار، ەلىمىزدە ازاماتتاردىڭ اۆتورلىق قۇقى تولىعىمەن قورعالماي وتىر. سەنات وتىرىسىندا زياتكەرلىك مەنشىك سالاسىن قۇقىقتىق رەتتەۋ ماسەلەسى تۋرالى زاڭ جوباسىن قاراۋ بارىسىندا دەپۋتات نۇرلان ورازالين وسىلاي دەدى. سەناتوردىڭ ايتۋىنشا، قازاقستاندا زياتكەرلىك مەنشىك قۇقىن قورعايتىن 3 ۇيىم بار. ونىڭ بىرەۋىنە تىركەلسەڭ، باسقا ۇيىمدار جاسالعان شارتتى وزدەرىنە الىپ پايدالانا بەرەدى. سالدارىنان ازاماتتاردىڭ قۇقى ساقتالماي، تابىستان قاعىلىپ وتىر. ال اۆتوردىڭ ەڭبەگىن پايدالانعاننان كەيىن سىياقى جينايتىن ۇيىمدارعا تۇسكەن قاراجاتتىڭ 30 پايىزىن بەرۋ قاراستىرىلماق. زاڭناما سەناتتىڭ ءبىرىنشى وقىلىمىندا ماقۇلدانىپ، ەكىنشى وقىلىمعا جىبەرىلدى.

نۇرلان ورازالين، ق ر پارلامەنتى سەناتىنىڭ دەپۋتاتى:

- تەاتردا سپەكتاكلىمىز قويىلادى، مۋزىكالىق مەكەمەلەردە اندەرىمىز ورىندالادى. سودان ءبىزدىڭ ۇجىمدىق قوعامدىق ۇيىمدار اۆتوردىڭ سىياقىسىن جيناقتايدى. سول جيناقتالعان سىياقىدان بىزدە قازاقستاندا كەيدە ءتىپتى كەلەڭسىزدىكتەر بولعان. ۇيىمدار 90 پايىزعا دەيىن وزدەرىنىڭ قالتاسىنا سالىپ الىپ، 5 پايىزىن اۆتورعا بەرگەن كەزەڭدەر بولعان. قازىر وسىنى زاڭ شەكتەپ وتىر.

www.24.kz