ارقا تورىندە وسىرىلگەن راۋشان گۇلدەر رەسەي نارىعىندا سۇرانىسقا يە - فوتو

كوكشەتاۋ. قازاقپارات - ارقا تورىندە وسىرىلگەن راۋشان گۇلدەر رەسەيدە نارىعىندا سۇرانىسقا يە. بۇل تۋرالى وبلىس اكىمى سەرگەي كۋلاگيننىڭ ستەپنوگور قالاسىنا كەزەكتى جۇمىس ساپارى بارىسىندا ايتىلدى.

ستەپنوگوردەگى «قۇنارلى» ج ش س ەلىمىزگە گۇل اتاسى - راۋشان گۇل وسىرۋمەن تانىمال. بۇگىن كۇنى مۇنداعى جىلىجايدا گوللاندىق تەحنولوگيا بويىنشا راۋشان گۇلىنىڭ بىرنەشە ءتۇرى ءوسىرىلىپ، ساۋداعا شىعارىلۋدا. سەرىكتەستىكتىڭ باس ديرەكتورى فاتيما ءىلياسوۆا گۇل ءوسىرۋ تەحنولوگياسىمەن ءبولىستى.

ونىڭ ايتۋىنشا، بۇل گوللاندىق تەحنولوگيا مەيلىنشە از اۋماقتان مول ءونىم جيناۋعا نەگىزدەلگەن.

«كوشەتتەردى مينەرالدى تالشىق ماتاعا وتىرعىزامىز. ونىڭ ارتىقشىلىعى وسكىن تامىرىنداعى وزگەرىستەردى تولىق باقىلاۋدا ۇستاپ، ونىڭ جەدەل جەتىلۋىنە قاتىستى امال-تاسىلدەردى تەز انىقتاپ، قولدانۋعا مۇمكىندىك بەرۋىندە. سۋدىڭ ءوزىن اۋەلى تازارتىپ، سوسىن جاڭبىرلاتىپ ەمەس، تامشىلاتىپ سۋارىلادى. جىلىجايدا قىس ايلارىنداعى ارقانىڭ 40 گرادۋس ايازىنا قارماستان جىل بويى ۇزدىك ءونىم الىنۋدا. وسى باعىتتا 60 ادام ەڭبەك ەتۋدە. بۇگىنگى تاڭدا تاۋلىگىنە 12 مىڭ گۇل الىپ وتىرمىز. ءونىمدى ەلىمىزدىڭ بارلىق وڭىرلەرىمەن قاتار، كورشى رەسەيدىڭ ومبى جانە ءنوۆوسىبىر قالالارىنا شىعارامىز. ول جاقتا ءبىزدىڭ راۋشان گۇلدەرگە سۇرانىس جوعارى. الداعى ۋاقىتتا ءوندىرىس كولەمىن ارتتىرۋ جوسپاردا بار»، - دەيدى فاتيما ءىلياسوۆا.