اتا- بابام جۇرگەن جول تۋرالى كينو تۇسىرمەكپىن - باھادۇر حاكىم
1978 - جىلى تۇركيانىڭ يزمير قالاسىندا تۋعان باھادۇر حاكىم (Bahadır Hakim) - جىلدان بەرى تۇرىك ەلىندە 10 فيلمگە تۇسكەن.
باھادۇر تۇسكەن كينولاردىڭ اراسىندا كومەديالىق تۋىندىلار دا، كوپ سەريالى فيلمدەر دە بار. كەيىپكەرلەرىنىڭ ەسىمدەرى ۋانگ لي، ايان لي تينگ نەمەسە چان لي بولعانىن ايتقان اكتەر «ماعان قىمبات وبراز - «ستامبۋلدا عاشىق بولدىم» فيلمىندەگى قازاق جىگىتى» دەيدى ازاتتىققا بەرگەن سۇحباتىندا.
- اكتەرلىك ماماندىقتى قالاي مەڭگەردىڭىز؟ العاشقى ءرولىڭىز قانداي ەدى؟
- مەن اكتەرلىك ماماندىعى بويىنشا مۇلدەم وقىماعان اداممىن. يزمير قالاسىندا جالپىلاما ءبىلىم بەرەتىن كوللەجدە وقىدىم. كوللەدج بىتىرگەن سوڭ تەرى وڭدەۋ جۇمىسىمەن اينالىستىم.
2002 - جىلى العاش تۇركياداعى بەلگىلى رەجيسسەر، ايگىلى «كوكجالدار مەكەنى» فيلمىنىڭ پروديۋسەر- رەجيسسەرى وسمان سىناۆ «Ekmek teknesi» فيلمىنە تۇسۋگە شاقىردى. فيلم تۇرىك ۇلتىنىڭ وزگە ۇلتقا قىز بەرمەۋ ءداستۇرى نەگىزىندە تۇسىرىلگەن كومەديا بولدى. وسى فيلمدە امەريكادان كوللەدج ءبىتىرىپ كەلگەن قىتاي جىگىتىنىڭ ءرولىن سومدادىم. ءۇش جىل تۇسىرىلگەن سەريالدىڭ العاشقى 20 بولىمىندە وينادىم.
ودان كەيىن «ىمىرت» («Alacakaranlık»)، G.O.R.A ، كەيىن İki Kafadar Chinese Connection (« ەكى دوس» ، 2013) سياقتى فيلمدەرگە ءتۇستىم.
جالپى، ماعان وسىعان دەيىن قىتاي، كارىس نە جاپون ازاماتتارىنىڭ ءرولى بەرىلىپ كەلدى. تەك تۇركيانىڭ TRT Avaz ارناسى تۇسىرگەن «ستامبۋلدا عاشىق بولدىم» ( «Istanbul'da Aşık Oldum») فيلمىندە عانا قازاقستاننان تۇركياعا جۇمىس ىستەۋگە كەلگەن قايرات دەگەن جىگىتتىڭ بەينەسىن جەتكىزدىم. مەن ءۇشىن وسى وبرازدىڭ ورنى وتە بولەك، ويتكەنى تۇڭعىش رەت قازاق رەتىندە ءوز ۇلتىمنىڭ ءرولىن وينادىم.
- قازاقستانعا تانىمال تۇرىك سەريالدارىنان ءسىز ويناعان كەيىپكەرلەردى كورە المادىق.
- ازىرگە قازاقستاندا كورسەتىلىپ جۇرگەن تۇرىك سەريالدارىنا تۇسكەن جوقپىن. ويتكەنى تۇرىكتەر كوبىنە ءرولدى بەت- الپەتىڭە قاراپ بەرەدى. مەنىڭ ءتۇرىم موڭعولويد بولعاندىقتان كوبىنەسە جاپوننىڭ، كارىستىڭ نە قىتايدىڭ رولدەرىن ۇسىناتىنى سودان.
- ال قازىر قانداي فيلمگە ءتۇسىپ ءجۇرسىز؟
- قازىر تۇركيانىڭ Kanal D ارناسىنىڭ تاپسىرىسىمەن «Ulan Istanbul» اتتى فيلمگە ءتۇسىپ جاتىرمىن. وسى كۇنگە دەيىن 34 ءبولىمى ءتۇسىرىلدى. وندا دا قىتاي ازاماتىنىڭ ءرولىن ويناپ ءجۇرمىن. كينودا قازاق ەكەنىمدى وزگەلەر بىلە ءجۇرسىن دەپ، كەيىپكەرىمە قىتايشا «ني حاۋ» دەۋدىڭ ورنىنا قازاقشا «قالايسىڭ؟» دەپ ايتقىزا سالامىن.وعان قوسا قازاقستانداعى «قازاقفيلم» كينوستۋدياسىمەن بىرىگىپ «اتاجۇرت جولى» جوباسىن قولعا الىپ وتىرمىن. وندا التايدان شىققان قازاق بالاسىنىڭ تيبەت، گيمالايدان اسىپ، ءۇندىستاندى باسىپ ءوتىپ، تۇركياعا كەلىپ توقتاعانى باياندالادى. اتا- بابامنىڭ ءجۇرىپ وتكەن جولى جايلى بۇل جوبا - باستان- اياق ءوز يدەيام. باستى ماقساتىم - سىرتتاعى قازاقتاردى، جالپى قازاق دەگەن ەلدى كينو ارقىلى تانىتۋ. ويتكەنى قازاقستان تاۋەلسىزدىگىن 1991 - جىلى العانىمەن ءالى ەشكىم بىلە قويمايدى.
- قازاقستاندا تۇسىرىلەتىن كينولاردا ويناۋ جوسپارىڭىز جوق پا؟
- جاڭا جىلدىڭ الدىندا الماتىعا بارىپ قايتتىم. قازاق حاندىعىنىڭ قۇرىلۋىنا بايلانىستى كينو تۇسىرىلگەلى جاتىر ەكەن. وسىعان بايلانىستى «قازاق فيلم» كينوستۋدياسىنىڭ باسشىلىعىنا جولىعىپ، سۋرەتتەرىمدى بەرىپ كەتتىم. ءبىراق ولار بۇل كينونى تۇسىرەتىن رەجيسسەرلار ءالى بەلگىلى ەمەس ەكەنىن، سسەناريىنىڭ دە دايىن ەمەس ەكەنىن ايتتى. ەگەر شاقىرسا، بارىپ تۇسەر ەدىم.
- سۇحبات بەرگەنىڭىزگە راقمەت.
«ازاتتىق»
