08:20, 03 - اقپان 2015 | GMT +6
قازاقستانداعى مەديتسينالىق مەكەمەلەرىندە قولدانىلاتىن شپريستەردىڭ باسىم بولىگى اتىراۋدا شىعارىلادى
اتىراۋ. قازاقپارات - بۇگىنگى تاڭدا قازاقستانداعى ەمدەۋ مەكەمەلەرىندە قولدانىلاتىن مەديتسينالىق شپريستەردىڭ باسىم بولىگى اتىراۋدا شىعارىلادى.
وسىدان بەس جىل بۇرىن ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا ءبىر رەتتىك شپريتس شىعاراتىن «براندو» زاۋىتى ىسكە قوسىلعان بولاتىن.
بۇگىنگى تاڭدا كاسىپورىن تولىق قۋاتىندا جۇمىس ىستەيدى جانە مەديتسينالىق ونىمدەردىڭ تۇرلەرىن كەڭەيتىپ تە كەلەدى.
«قۇرال- جابدىقتار - وكتۇستىك كورەيالىق، ال شيكىزات بولسا ازيا جانە ەۋروپا ەلدەرىنەن اكەلىنەدى. قازاقستانداعى وسىناۋ مەديتسينالىق شپريس شىعاراتىن بىرەگەي زاۋىت بەس جىلدىڭ ىشىندە تۇراقتى تۇردە ءارى ساپالى ونىمدەر شىعارۋدا. ەكونوميكالىق تيىمدىلىگىنە كەلەر بولساق، تەك وتكەن جىلدىڭ ىشىندە 2 ميلليارد تەڭگەنىڭ ءونىمى شىعارىلدى. مەملەكەت قازىناسىنا سالىق تۇرىندە 400 ميلليون تەڭگە قۇيىلدى»، - دەيدى كاسىپورىننىڭ باس ينجەنەرى مۇحتار ماحمەتوۆ.
