ب. ساپاربايەۆ: ۇكىمەت ەكونوميكا ءوسىمىنىڭ قارقىنىن ساقتاۋ ءۇشىن ءبىرقاتار شارالار قابىلدايدى - فوتو

قاراعاندى. قازاقپارات - قازاقستان ۇكىمەتى ەل پرەزيدەنتىنىڭ تاپسىرماسىن ورىنداۋ ماقساتىندا ەكونوميكا ءوسىمىنىڭ قارقىنىن ساقتاۋ، حالىقتى جۇمىسپەن قامتۋدى قامتاماسىز ەتۋ ءۇشىن شارالار قابىلدايدى.

بۇل تۋرالى ق ر پرەمەر- ءمينيسترىنىڭ ورىنباسارى بەردىبەك ساپاربايەۆ قاراعاندى وبلىسىنا جۇمىس ساپارى بارىسىندا مالىمدەدى.

«ارينە، الەمدەگى، اسىرەسە ءبىزدىڭ كورشى ەلدەر ەكونوميكاسىندا ورىن العان جاعداي قازاقستانعا اسەر ەتپەي قويمايدى. وسىعان قاراماستان، وزدەرىڭىز بىلەسىزدەر، وتكەن جىلى 4 پايىز كولەمىندە ەكونوميكا وسىمىنە قول جەتكىزدىك. قازىر الەمدىك داعدارىس جاعدايىندا، شىعارىلاتىن ونىمگە سۇرانىس تومەندەۋ جاعدايىندا ءبىز ەكونوميكا ءوسىمىنىڭ قارقىنىن ساقتاۋىمىز قاجەت. ەل پرەزيدەنتى ءتيىستى تاپسىرما دا بەردى»، - دەدى ب. ساپاربايەۆ ءوڭىردىڭ ونەركاسىپتىك الەۋەتىن دامىتۋ ماسەلەلەرى بويىنشا «سارى ارقا» ە ە ا اۋماعىندا وتكەن ماجىلىستە.

ءوز سوزىندە ۆيسە- پرەمەر پرەزيدەنتتىڭ «نۇرلى جول» جولداۋىن ىسكە اسىرۋ جونىندەگى مىندەتتەرگە توقتالدى.

ب. ساپاربايەۆ مەملەكەت باسشىسىنىڭ تاپسىرماسىن ورىنداۋ ءۇشىن ۇكىمەت ەلەكتر ەنەرگياسىنا، كولىك، شيكىزات بازاسىن جاقسارتۋعا، قازاقستاندىق قامتۋدى ۇلعايتۋعا جەڭىلدىك تاريفتەرىن بەرۋ ارقىلى وتاندىق تاۋار وندىرۋشىلەردى قولداۋ جوسپارىن ازىرلەدى.

«بۇل شارالار كاسىپورىننىڭ جۇمىس ىستەۋىنە باعىتتالدى. ەڭ باستىسى - جۇمىسپەن قامتۋدى قامتاماسىز ەتۋ، جۇمىسسىزدىقتىڭ وسۋىنە جول بەرمەۋ. بيلىك پەن جۇمىس بەرۋشىلەر بىرلەسە وتىرىپ قويان- قولتىق جۇمىس ىستەسەك، ناتيجەسى دە جەمىستى بولاتىنىنا سەنەمىز»، - دەپ اتاپ ءوتتى ۆيسە- پرەمەر.

جيىن قورىتىندىسىنا سايكەس، ءۇش باعىت بويىنشا سوماسى 57 ميلليارد تەڭگەگە ىنتىماقتاستىق تۋرالى 47 مەموراندۋمعا قول قويىلدى، ءبىرىنشى - وندىرىستىك ۇردىستەردى تۇراقتاندىرۋ، قىزمەتكەرلەردىڭ ەڭبەك قۇقىقتارى مەن جۇمىسقا ورنالاسۋىن قامتاماسىز ەتۋ ماسەلەلەرى بويىنشا وبلىس اكىمدىگى، جۇمىس بەرۋشىلەر جانە كاسىپوداقتار اراسىنداعى ءوزارا تۇسىنىستىك پەن ىنتىماقتاستىق تۋرالى. ەكىنشى - وبلىس اكىمدىگى مەن ۇلتتىق كومپانيالار اراسىنداعى جەرگىلىكتى قامتۋدى دامىتۋ ماسەلەلەرى جونىندەگى ىنتىماقتاستىق تۋرالى. ءۇشىنشى - جۇيە قۇراۋشى كاسىپورىندار مەن قاراعاندى وبلىسىنىڭ وتاندىق تاۋار وندىرۋشىلەرى اراسىنداعى جەرگىلىكتى قامتۋدى دامىتۋ ماسەلەلەرى بويىنشا ىنتىماقتاستىق تۋرالى.

«نارىق كونيۋنكتۋراسىن، ەنەرگيا رەسۋرستارىنا باعانىڭ ءتۇسۋىن ەسەپكە الىپ، وندىرىستىك ۇردىستەردى تۇراقتاندىرۋ مەن ەڭبەك قۇقىقتارى مەن قىزمەتكەرلەر كەپىلدىكتەرىن قامتاماسىز ەتۋ ماسەلەلەرى اسا وزەكتى بولا تۇسۋدە. سوندىقتان، قاراعاندى وبلىسى كوپتەگەن ونەركاسىپتىك كاسىپورىندار شوعىرلانعان ەلدىڭ ءىرى يندۋستريالدىق ورتالىعى بولعاندىقتان، مەملەكەت باسشىسىنىڭ ەرەكشە باقىلاۋىندا تۇر»، - دەپ اتاپ ءوتتى ءوڭىر باسشىسى ن. ابدىبەكوۆ.

ب. ساپاربايەۆتىڭ ايتۋىنشا، تاياۋ كۇندەرى ەلدىڭ بارلىق وڭىرلەرىندە 2000 نان استام وسىنداي مەموراندۋمدار جاسالماق.