حالىقارالىق «دارابوز» بايگەسى جاريالاندى
كونكۋرستىڭ ماقساتى:
جاس ۇرپاققا جاڭا زامان تالاپتارىنا ساي شىنايى پاتريوتتىق تاربيە بەرەتىن، ولاردى ۇلتجاندىلىققا، يماندىلىق پەن ادالدىققا، ءوز ۇلتىنىڭ وتكەن تاريحى مەن سالت-داستۇرىنە دەگەن سۇيىسپەنشىلىك رۋحقا باۋليتىن تارتىمدى دا مازمۇندى شىعارمالار شوعىرىن مولايتۋ، سوعان ۇيتقى بولۋ. سول ارقىلى بالالاردىڭ كىتاپ وقۋعا، جالپى ءبىلىم الۋعا دەگەن ىنتا-جىگەرلەرىن ارتتىرۋ. بالالار ادەبيەتىنىڭ ءرولى مەن بەتبەدەلىن كوتەرۋ، ءورىسىن كەڭەيتىپ، كوسەگەسىن كوركەيتۋ.
كونكۋرس شارتتارى:
بايگەگە بالاباقشا بۇلدىرشىندەرى مەن 1-9 سىنىپ وقۋشىلارىنا لايىقتالىپ جازىلعان بالالار ادەبيەتىنىڭ بارلىق جانرىنداعى (پروزا، پوەزيا، ساحنالىق قويىلىم، ەرتەگى، جۇمباق، جاڭىلتپاش ت. س. س.) بۇرىن ەش جەردە جاريالانباعان كوركەم شىعارمالار ۇسىنىلادى. حيكاياتتار - 20-25 بەتتەن، اڭگىمە، ەرتەگىلەر - 10 بەتتەن، ەرتەگى جانە توپتاما ولەڭدەر، باللادالار، شاعىن داستاندار، ساحنالىق قويىلىمدار 10 بەتتەن اسپاۋى كەرەك. كونكۋرسقا بالاباقشا بۇلدىرشىندەرىنە ارنالعان قىسقا اڭگىمەلەر مەن توپتاما ولەڭدەردەن باسقا تەك ءبىر عانا شىعارما جىبەرىلۋى شارت.
شىعارمانىڭ باس جاعىنا «دارابوز» بايگەسىنە!» دەگەن ايدار، سوڭىنا اۆتوردىڭ بۇركەنشىك اتى (پسيەۆدونيمى) عانا قويىلۋى ءتيىس.
كوركەم شىعارمالار كومپيۋتەرلىك ستاندارتقا ساي 14 كەگلمەن (ارالىق - 1) تەرىلىپ، ءۇش داناسىنىڭ دا بىردەي بەتتەلۋى جانە ستەپلەرمەن مۇقيات بەكىتىلۋى قاتاڭ تالاپ ەتىلەدى.
جابىق كونكۋرس بولعاندىقتان، اۆتوردىڭ اتى-ءجونى، مەكەن-جايى مەن بايلانىس تەلەفوندارى جازىلعان اقپار-پاراق جەكە، كىشى كونۆەرتكە سالىنىپ، ونىڭ سىرتىنا اۆتوردىڭ (شىعارما سوڭىنداعى) بۇركەنشىك اتى عانا جازىلادى.
بايلانىس بولىمشەلەرىندە تۇسىنبەستىك تۋىنداماس ءۇشىن وسى كىشى كونۆەرت پەن شىعارمانىڭ ءۇش داناسى سالىنعان ۇلكەن (ا-4) كونۆەرتتىڭ سىرتىنا دا («كىمنەن» دەگەن تۇسقا) بۇركەنشىك اتتى نەمەسە كەز كەلگەن ءبىر ويدان شىعارىلعان (ماسەلەن، شالقار شابىت دەگەن سياقتى) لاقاپ اتتى قويا سالعان ءلازىم.
وسى تالاپتار مەن شارتتاردىڭ ءبىرى ورىندالماعان شىعارما قازىلار القاسىنىڭ تالقىسىنا ۇسىنىلمايدى. بايگەگە بارلىق قالامگەرلەر، تالاپكەرلەر، شەتەلدەگى قانداستارىمىز قاتىسا الادى. تەك تۋىندى بۇگىنگى قازاق الىپبيىمەن، ياعني كيريليتسامەن جازىلۋى مىندەتتى.
بايگەگە ۇسىنىلاتىن شىعارمالار مىنا مەكەن-جايعا جولدانادى:
050008, الماتى قالاسى، «دارابوز» بايگەسىنە. 010057505№ كۋالىك يەسىنە.
شىعارمالار 2015-جىلدىڭ 20- ساۋىرىنە دەيىن قابىلدانىپ، جەڭىمپازدار حالىقارالىق بالالاردى قورعاۋ كۇنى قارساڭىندا انىقتالادى.
بايگە قورى:
ەسەنقۇل قاجى مامانوۆ اتىنداعى باس جۇلدە - 1000000 (ءبىر ميلليون) تەڭگە.
ءبىرىنشى بايگە (ەكەۋ) - 400 مىڭ تەڭگەدەن.
ەكىنشى بايگە (ەكەۋ) - 200 مىڭ تەڭگەدەن.
ءۇشىنشى بايگە (ۇشەۋ) - 150 مىڭ تەڭگەدەن.
ىنتالاندىرۋ بايگەسى (تورتەۋ) - 100 مىڭ تەڭگەدەن.
قازىلار القاسىنىڭ شەشىمى قايتا قاراۋعا جانە تەكسەرىلۋگە جاتپايدى.
بايگە قورىتىندىسى بويىنشا جۇلدەلى ورىندارعا يە بولعان تۋىندىلار ەكى تىلدە شىعاتىن كەزەكتى «كاۋسار بۇلاق»، «چيستىي رودنيك» كىتاپتارىندا جارىق كورىپ، بالاباقشا مەن مەكتەپ كىتاپحانالارىنا تەگىن تاراتىلادى.
حالىقارالىق «دارابوز» بايگەسىنىڭ ۇيىمداستىرۋ القاسى
