قازاقستان ازاماتتارى ءۇشىن اۆتوكولىك باعالارى تومەندەيدى
بۇل تۋرالى استانا قالاسى بويىنشا مەملەكەتتىك كىرىستەر دەپارتامەنتىنىڭ باسپا ءسوز قىزمەتى حابارلايدى. سەميناردىڭ ماقساتى - 2015-جىلدىڭ 1- قاڭتارىنان باستاپ كۇشىنە ەنگەن سالىق، كەدەن، اكىمشىلىك جانە قىلمىستىق زاڭنامالارداعى وزگەرىستەرىمەن سالىق تولەۋشىلەردى تانىستىرۋ. ءىس-شاراعا استانا قالاسىنىڭ جەكە كومپانيالارىنان كەلگەن بارلىعى 600 سالىق تولەۋشى قاتىستى.
استانا قالاسى بويىنشا مەملەكەتتىك كىرىستەر دەپارتامەنتىنىڭ باسشىسى ءابىلقايىر سقاقوۆتىڭ ايتۋىنشا، زاڭناماعا جاڭا وزگەرىستەر بيزنەس راسىمدەرىن جەڭىلدەتۋ جانە بيزنەس كليماتتى جاقسارتۋ ماقساتىندا ەنگىزىلگەن. سەمينارعا ءتوراعالىق ەتكەن باسشى نەگىزگى وزگەرىستەرگە قىسقاشا توقتالدى:
* 2015-جىلدان باستاپ كاسىپكەرلەر جۇزەگە اسىرىلعان تاۋارلار مەن قىزمەت كورسەتۋ تۋرالى ەسەپ بەرمەي-اق، ءوز ەركىمەن ەلەكتروندى شوت-فاكتۋرالاردى الۋ مۇمكىندىگىنە يە.
* سالىق تولەۋشىلەر ءوز كاسىبىن توقتاتقان جاعدايدا، سالىق ورگانىنا تاپسىراتىن قۇجاتتاردىڭ سانى ازايادى.
* اۋديتورلىق مەكەمەلەردىڭ تۇجىرىمدامالارى نەگىزىندە زاڭدى جانە جەكە تۇلعالاردىڭ ءوز ەركىمەن مەكەمەنى تاراتۋ ءتارتىبى دە جەڭىلدەتىلەدى.
* جەكە كاسىپكەرلەر كاسىبىن توقتاتۋ كەزىندە كامەرالدى باقىلاۋدان بوساتىلادى.
* بيزنەس سۋبەكتىلەرى جوسپارلى تەكسەرۋلەردەن دە بوساتىلادى. جوسپارلى تەكسەرۋلەردىڭ ورنىنا تاۋەكەلدەردى باعالاۋ جۇيەسى ەنگىزىلەدى.
* ە ا ە و تەرريتوريالارىنان اكەلىنگەن اۆتوكولىكتەر ءۇشىن جەكە تۇلعالار قوسىمشا قۇن سالىعىن تولەۋ مەن اكسيزدەن بوساتىلادى. مۇنىڭ اسەرىنەن قازاقستان ازاماتتارى ءۇشىن اۆتوكولىك باعالارى تومەندەيدى.
* سىرتقى ەكونوميكالىق قىزمەتىنىڭ قاتىسۋشىلارى تاۋار يمپورتى كەزىندە ە ا ە و مۇشە ەلدەرىنىڭ تەرريتوريالارىنان اكەلىنگەن تاۋار ءۇشىن سالىق ەسەبىن ەلەكتروندى نۇسقادا ۇسىناتىن بولادى.
سونىمەن قاتار دەپارتامەنت باسشىسى ءتۇسىندىرۋ جۇمىسىنىڭ جاڭا فورماتى تۋرالى ايتتى. ەندى سالىق قىزمەتكەرلەرى ۆەبينار ارقىلى سالىق تولەۋشىلەرمەن بايلانىسقا شىعىپ، ءتۇسىندىرۋ جۇمىستارىن جۇرگىزەدى. سالىق تولەۋشىلەر دەپارتامەنتكە كەز كەلگەن سۇراقتارىن جولداي الادى. اقپارات الماسۋ كەڭىستىگىن كەڭەيتۋ ماقساتىندا الەۋمەتتىك جەلىلەردە دەپارتامەنتتىڭ جەكە پاراقشالارى اشىلدى.
24.kz
