اتامەكەنگە ورالعان قانداستارىمىز تۋرالى فيلم ءتۇسىرۋ باستالدى

استانا. قازاقپارات- «قازاق فيلم» كينوستۋدياسىندا «تورەتام» كوركەم فيلمىن ءتۇسىرۋ جۇمىستارىنا دايىندىق باستالدى. شىعارماشىلىق ۇجىم باستى رولدەردى سومدايتىن اكتەرلەر مەن تۇسىرىلەتىن جەرلەردى تاڭداپ قويدى.

 ەندىگى ماسەلە قاراجاتتا بولىپ وتىر. فيلم «تورەتام» دەگەن كەنتتىڭ اتىمەن اتالماق. وقيعا جەلىسى 2000 - جىلدارى اۋعانستاننان اتامەكەنگە ورالعان قانداستارىمىزدىڭ وسى ەلدى مەكەنگە كەلىپ تۇراقتاعان كەزدەگى تۇرمىس- تىرشىلىگىنەن باستالادى.

ولار باستاپقى كەزدە جۇمىسسىزدىق، باسپانا مەن ءتىل ماسەلەسى سياقتى قيىندىقتارعا تاپ بولادى. اۋعان جەرىندە ءتۇسىرىلىم جۇمىستارىنا رۇقسات بەرىلمەگەندىكتەن، ول ەلدەگى كورىنىستەر كورشى تاجىكستاننىڭ تاۋلى ايماعىنداعى قىستاقتارىندا تۇسىرىلەتىن بولدى. شىعارماشىلىق توپ جاقىندا تاجىكستاندا بولىپ، اۋعان اۋىلدارىنا ۇقساس ەلدى مەكەندەردى كورىپ قايتتى. قازاقستانداعى ءتۇسىرىلىم بالقاش وڭىرىندە وتەدى.

ءسابيت قۇرمانبەكوۆ، كينورەجيسسەر، سۋرەتشى

- كينونىڭ يدەياسى 2-3 جىل بۇرىن كەلگەن. ءبىر وتباسىنىڭ وقيعاسى. ەڭ باستى ۇيىتقى بولىپ وتىرعان ول ۇلكەن كىسى، 1930 - جىلدارى وسى جاقتان كەتكەن. سول كىسى ەلىنە، وتانىنا كەلۋدى ارمانداعان ءومىر بويى. سول بالا- شاعاسى بار، نەمەرەلەرى بار سولار وتانىنا قايتىپ كەلەدى اتامەكەنىنە. وتانى قالاي قابىلدايدى؟ ءبىزدىڭ ادامدارمەن سول ورالعان ادامداردىڭ قارىم- قاتىناسى تۋرالى كينو.

ۆيدەوپروبا جاسادىق. ناتۋرا دەيدى، تۇسىرەتىن جەرلەردى ءبارىن تاڭداپ قويدىق. سول ەندى قاراجاتقا عانا قاراپ وتىرمىز. فيلمنىڭ بيۋدجەتى بەكىتىلگەن سوڭ شىعارماشىلىق توپ ءتۇسىرۋ جۇمىستارىن باستايدى.

شىعارماشىلىق توپ كينو سالاسىندا ەڭبەگى سىڭگەن مايتالماندار مەن جاس مامانداردان قۇرالعان. سسەناري اۆتورى قازاقستاننىڭ ەڭبەك سىڭىرگەن ءارتيسى، اكتەر، دراماتۋرگ -  نۇرلان سانجار. كينوكارتينانىڭ ديرەكتورى -  تاڭىربەرگەن حاشييەۆ، ەكىنشى رەجيسسەر -  بولات ىسقاقوۆ.

www.khabar.kz