قازاقستاندىق عالىمدار بەيجىڭنەن قازاق حاندىعىن زەرتتەۋگە قاتىستى جاڭا قۇجاتتار تاپتى

استانا. قازاقپارات - حالىقارالىق تۇركى اكادەمياسى عالىمدارىنان قۇرالعان دەلەگاتسيانىڭ بەيجىڭگە ساپارى بارىسىندا قازاق حاندىعى تاريحىنىڭ جاڭا بەتتەرىن اشاتىن قۇندى قۇجاتتار تابىلدى.

 حالىقارالىق تۇركى اكادەمياسى بەيجىڭدە قازاق حاندىعىنىڭ قۇرىلۋىنىڭ 550 جىلدىعىنا ارنالعان جيىن وتكىزدى.

 حالىقارالىق تۇركى اكادەمياسىنىڭ پرەزيدەنتى دارحان قىدىرالى ەلباسىنىڭ  ۇلىتاۋ تورىندە بەرگەن سۇحباتىنداعى ءۇزىندىنى كەلتىردى. وندا: «قازاق جۇرتىنىڭ ارعى ءتۇبى عۇنداردان باستالادى. عۇنداردان كەيىن كوك تۇركىلەرگە جالعاسادى. ودان كەيىن التىن وردا ورنىعادى. ءسويتىپ، حاندىق داۋىرگە ۇلاسىپ، كەيىن بىرتىندەپ تاۋەلسىزدىككە كەلىپ تىرەلەدى»، - دەلىنگەن.

 قىتايلىق عالىمدار قازاق حاندىعىنىڭ ماتەريالدارىنا قىزىعۋشىلىق تانىتتى.

«قازاق عالىمدارىنىڭ ءبىزدىڭ ينستيتۋتقا كەلىپ، بايانداما وقىپ، پىكىر ءبولىسۋى قازاق تاريحىنىڭ، جالپى قازاق حالقى تۋرالى ءبىزدىڭ تۇسىنىگىمىزدى كەڭەيتتى. وسى سىندى شارالار ءبىزدىڭ ستراتەگيالىق ماڭىزدى كورشىمىز قازاقستانمەن گۋمانيتارلىق- مادەني قاتىناستىڭ كەڭەيۋىنە وڭ اسەرىن تيگىزەدى»، - دەپ اتاپ ءوتتى قىتاي قوعامدىق عىلىمدار اكادەمياسىنىڭ ەتنولوگيا جانە انتروپولوگيا ينستيتۋتىنىڭ ديرەكتورى ۆان يانچجۋن.

 بەلگىلى عالىم، پروفەسسور باي سۋي سيننىڭ سوزىنە قاراعاندا، 1950 - جىلدان قىتاي تىلىندە قازاق حالقىنىڭ تاريحى مەن مادەنيەتى تۋرالى 2600 دەن استام عىلىمي ماقالا مەن 10 نان استام كىتاپ جارىق كوردى. سوڭعى كەزدەرى اتالعان باعىتتى زەرتتەۋ بويىنشا دوكتورلىق جانە ماگيسترلىق جۇمىستار سانى كوبەيدى.

 شارا سوڭىندا قىتاي قوعامدىق عىلىمدار اكادەمياسىنىڭ بىرنەشە ينستيتۋتى حالىقارالىق تۇركى اكادەمياسىمەن تىعىز قارىم- قاتىناستا جۇمىس جاساۋعا دايىن ەكەندىكتەرىن ءبىلدىردى.

اتاپ ءوتۋ كەرەك، ساپار بارىسىندا حالىقارالىق تۇركى اكادەمياسى عالىمدارى قازاق حاندىعى تۋرالى بۇرىن جاريالانباعان قۇندى قۇجاتتاردى قولعا ءتۇسىردى. سولاردىڭ ىشىندە قازاق حاندارى مەن سۇلتاندارىنىڭ چيڭ يمپەراتورىنا شاعاتاي جانە قالماق تىلدەرىندە جازعان حاتتارى، قازاق حاندىعى مەن چيڭ مەملەكەتى اراسىنداعى ديپلوماتيالىق بايلانىس تۋرالى مانجۋر تىلىندەگى ماڭىزدى قولجازبالار بار.

قىتايعا ساپارى اياسىندا حالىقارالىق تۇركى اكادەمياسىنىڭ پرەزيدەنتى مىڭداعان جىل بۇرىن تۇركى ءالىپبيىن جازعان جانە ءتىلىمىزدىڭ اسەمدىگىن الەمگە پاش ەتكەن ماحمۇد قاشعاريدىڭ مولاسىندا بولدى. سونداي- اق بيىل مىڭ جىلدىق مەرەيتويى تويلانعان يۋسۋف بالاساعۇنيدىڭ رۋحىنا تاعزىم ەتتى. دەلەگاتسيا ۇرىمجىدەگى قازاق زيالىلارىمەن جانە عىلىم وكىلدەرىمەن كەزدەستى.