كەدەندىك وداق ەلدەرىنەن اۆتوكولىكتەردى ءوز پايداسى ءۇشىن اكەلەتىندەر عانا قۇن سالىعىن تولەمەيدى

الماتى. قازاقپارات - قازاقستاندا كەدەندىك وداق ەلدەرىنەن اكەلىنەتىن اۆتوكولىكتەرگە سالىناتىن قوسىلعان قۇن سالىعىنىڭ جويىلۋى - كولىكتەردى ءوز پايداسى ءۇشىن الىپ كەلەتىن (كاسىپكەرلىك ماقساتتا ەمەس) جەكە تۇلعالارعا عانا قاتىستى بولادى. ونىڭ ۇستىنە، اكەلگەن كولىكتەرىن ولار زاڭ بويىنشا بەلگىلەنگەن مەرزىمگە دەيىن قايتا ساتا المايدى.

بۇل تۋرالى بۇگىن قازاقستاننىڭ اۆتوبيزنەس قاۋىمداستىعىنىڭ باسپا ءسوز قىزمەتىنەن حابارلادى.

«قازىر كوپتەگەن بۇقارالىق اقپارات قۇرالدارىندا رەسەيدەن جانە بەلورۋسسيادان الىپ كەلىنەتىن جاڭا جانە ۇستالعان اۆتوكولىكتەرگە سەرتيفيكاتتاۋدىڭ كەرەك ەمەستىگى تۋرالى ايتىلىپ تا جازىلىپ تا جاتىر. بۇل قاتە تۇسىنىك. زاڭدى جانە جەكە تۇلعالار قازاقستانعا جاڭا اۆتوكولىكتەردى اكەلۋ بارىسىندا اۆتوكولىك قۇرالى ءتيپىن ماقۇلداۋ تۋرالى كەدەندىك وداقتىڭ ءتيىستى قۇجاتىن الۋلارى كەرەك. بۇل قۇجات وسى تيپتەگى اۆتوكولىكتىڭ كەدەندىك وداق اۋماعىندا ساپا جانە قاۋىپسىزدىك بويىنشا قويىلاتىن ستاندارتتارعا سايكەستىگىن راستايدى»، - دەلىنگەن حابارلامادا.

 ال ۇستالعان اۆتوكولىكتەردى الىپ كەلەتىن زاڭدى جانە جەكە تۇلعالار اۆتوكولىكتىڭ قاۋىپسىزدىك نورمالارىنا سايكەستىگى جونىندە قۇجات الۋلارى ءتيىس. ويتكەنى، كەزىندە رەسەيدىڭ جانە بەلورۋسسيانىڭ ەسەبىندە تۇرعان، ال كەيىن قازاقستانعا جەتكىزىلگەن اۆتوكولىكتەر كەدەندىك وداقتىڭ 018/2011 اتتى جاڭا تەحنيكالىق رەگلامەنتىنىڭ تالاپتارىنا سايكەس كەلەتىن كولىكتەر بولىپ ەسەپتەلمەيدى. ويتكەنى، بۇل اۆتوكولىكتەر 2015 - جىلدىڭ 1 - قاڭتارىنا دەيىن، ياعني جوعارىدا اتالعان تەحنيكالىق رەگلامەنت كۇشىنە ەنبەي تۇرعاندا، ءوز ەلدەرىنىڭ ۇلتتىق تالابى بويىنشا قويىلاتىن سايكەستىك باعاسىنان وتكىزىلىپ قويىلعان.

«تەحنيكالىق رەگلامەنتكە جانە ەۋرو-4 ستاندارتىنىڭ ەڭ تومەنگى ەكولوگيالىق تالاپتارىنا سايكەس كەلمەيتىن كولىكتەردى ساتىپ الۋدىڭ قاجەتى جوق. مۇنداي كولىكتەردى ەسەپكە تۇرعىزۋ مۇمكىن بولمايدى»، - دەپ تۇسىندىرەدى قازاقستاندىق اۆتوبيزنەس قاۋىمداستىعىنىڭ پرەزيدەنتى اندرەي لاۆرەنتيەۆ.

اۆتور: جاپپاربەرگەن ايبوتا