ءىلياس ەسەنبەرليننىڭ تاريحي روماندارى كەڭەس وداعى كەزىندە حالقىمىزدىڭ تاريحي ساناسىنىڭ ويانۋىنا ولشەۋسىز ۇلەس قوستى
مۇنداي پىكىردى بۇگىن حالىقارالىق تۇركى اكادەمياسىنىڭ ۇيىمداستىرۋىمەن بەلگىلى جازۋشى ءىلياس ەسەنبەرليننىڭ تۋعانىنا 100 -جىل تولۋىنا وراي وتكىزىلىپ جاتقان «كوركەم شىعارماداعى تاريحي شىندىق» اتتى وتىرىستا اكادەميك سەيىت قاسقاباسوۆ ءبىلدىردى.
«قازاق قالامگەرلەرى اراسىندا ۇلت تاريحىنا قاتىستى العاش بولىپ كەسەك تۋىندىلار جازعان ءى. ەسەنبەرلين كەڭەس وداعى كەزىندە حالقىمىزدىڭ تاريحي ساناسىنىڭ ويانۋىنا ولشەۋسىز ۇلەس قوستى. «قاھار»، «الماس قىلىش»، «جانتالاس» اتتى تاريحي رومانداردان تۇراتىن «كوشپەندىلەر» تريلوگياسى ەلدىڭ ءتول تاريحىنا دەگەن قىزىعۋشىلىعىن ارتتىردى»، - دەپ اتاپ ءوتتى عالىم.
حالىقارالىق تۇركى اكادەمياسىنىڭ پرەزيدەنتى دارحان قىدىرالىنىڭ ايتۋىنشا، شارا سونىمەن قاتار ەلباسىنىڭ تاپسىرماسىمەن بيىل كەڭ كولەمدە اتالىپ وتىلەتىن قازاق حاندىعىنىڭ 550 جىلدىق مەرەيتويىنا دا ارنالىپ وتىر.
القالى جيىنعا ن. ايت ۇلى، ق. مۇحامەدقاليەۆ، س. قاسقاباسوۆ، ق. سالعارا ۇلى سىندى مەملەكەتتىك سىيلىقتىڭ يەگەرلەرى، قالامگەرلەر، عالىمدار، ق ر پارلامەنتىنىڭ دەپۋتاتتارى، تاريحشىلار مەن قوعام قايراتكەرلەرى جانە جازۋشىنىڭ نەمەرەسى ماعجان ەسەنبەرلين قاتىستى.
ايتا كەتەيىك، ءى. ەسەنبەرليننىڭ قالامىنان تۋعان الاش جۇرتىنىڭ 700 جىلدىق تاريحىن سۋرەتتەيتىن «التىن وردا»، «كوشپەندىلەر» سەكىلدى سۇيەكتى شىعارمالارىندا ۇلى دالا مادەنيەتى، قازاق حاندىعى تۋرالى مول ماعلۇمات قامتىلعان. جازۋشىنىڭ 17 رومانى مەن كوپتەگەن شىعارمالارى الەمنىڭ 30 عا جۋىق تىلىنە اۋدارىلعان.
