قازاقستان تاريحى تۋرالى دەرەكتى فيلمدەردى تۇسىرۋگە الەمدىك تانىمالى تەلەارنالاردى تارتۋ كوزدەلۋدە
بۇل تۋرالى قازاقپارات تىلشىسىنە ق ر مادەنيەت جانە سپورت مينيسترلىگىنەن حابارلادى.
«Discovery, BBC، National Geographic سىندى الەمگە تانىمال برەندتەر - بىرنەشە ونداعان جىلدار بويى عىلىمي- تانىمدىق جانە تاريحي فورماتتارداعى تەلەجوبالاردى تۇسىرەتىن تاۋەلسىز تەلەكومپانيالار. وكىنىشكە وراي، قازاقستاندا مۇنداي كومپانيالار ازىرگە جوق. ءبىراق ءبىز «ماڭگىلىك ەل» ارنايى باعدارلاماسى اياسىنداعى جوبالاردى جۇزەگە اسىرۋعا BBC، History, Discovery, Euronews, Arte, RAI جانە باسقا دا شەتەل تەلەكومپانيالارىن تارتۋدى كوزدەپ وتىرمىز»، - دەلىنگەن مينيسترلىكتىڭ «قازاقپارات» ح ا ا رەسمي ساۋالىنا بەرگەن جاۋابىندا.
مادەنيەت جانە سپورت مينيسترلىگىنىڭ حابارلاۋىنشا، «قازاق فيلم» كينوستۋدياسى جىل سايىن 20-25 دەرەكتى فيلم تۇسىرەدى. ولاردىڭ تاقىرىپتىق اياسى دا كەڭ: مەملەكەت باسشىسىنىڭ قىزمەتى مەن ونىڭ قازىرگى قازاقستاننىڭ دامۋىنا قوسقان ۇلەسى، مادەنيەت، عىلىم جانە سپورت قايراتكەرلەرىنىڭ ءومىرى مەن ەڭبەگى، قازاقتاردىڭ مادەني مۇراسى، سونىمەن بىرگە قازاقستان تاريحىنىڭ جەكەلەگەن كەزەڭدەرى تۋرالى تۇسىرىلەدى.
ۇلتتىق فيلمدەردىڭ «ماڭگىلىك ەل» ارنايى باعدارلاماسى مەملەكەت باسشىسىنىڭ «قازاقستاندىق جول-2050: ورتاق ماقسات، ورتاق مۇددە، ورتاق بولاشاق» اتتى حالىققا جولداۋىندا بەرىلگەن تاپسىرماسىن ورىنداۋ ماقساتىندا جاساقتالدى. ونىڭ باستى ماقساتى قازاق مەملەكەتتىلىگىنىڭ قالىپتاسۋىن كورسەتەتىن تاريحي- پاتريوتتىق فيلمدەردى شىعارۋ.
ارنايى باعدارلامانىڭ جوبالارى قازاقستان جانە الەم كينەماتوگرافيستەرىنىڭ كومەگىمەن الداعى ءۇش جىل بويى - 2015-2017 -جىلدار ارالىعىندا تۇسىرىلەدى.
اۆتور: جاسۇلان جولدىبايەۆ
