تالدىقورعانداعى مەشىتتە شەت تىلدەرىن تەگىن وقىتاتىن كۋرستار اشىلدى

تالدىقورعان. قازاقپارات - تالدىقورعان قالاسىنداعى «يمان» ورتالىق مەشىتىنىڭ جانىنان اعىلشىن جانە اراب تىلدەرىن تەگىن وقىتاتىن كۋرستار اشىلدى.

جاڭا جوبانىڭ ارقاسىندا نيەت بىلدىرگەن ءاربىر ادام مەشىت قابىرعاسىندا يسلام ءدىنىنىڭ باستى قۇندىلىقتارى تۋرالى ءبىلىپ قانا قويماي، ەندى شەت تىلدەرىن دە مەڭگەرە الادى.

ابىلاي حان اتىنداعى حالىقارالىق قاتىناستار جانە شەت تىلدەرى ۋنيۆەرسيەتىنىڭ تۇلەگى بوتاگوز نۇرقوجا بۇل جەردە اعىلشىن تىلىنەن ساباق بەرەدى.

«قازىرگى كەزدە كۋرستارىمىزعا 30 ادام قاتىسۋدا. تىڭداۋشىلاردىڭ اراسىندا ستۋدەنتتەر، جاس انالار، ءۇي شارۋاسىنداعى ايەلدەر، اعا بۋىن وكىلدەرى دە بار. ساباقتار اپتاسىنا ەكى رەت وتكىزىلەدى»، - دەدى ول.

ءدىن وكىلدەرىنىڭ ايتۋىنشا، مەدرەسەگە جاسى، ۇلتى جانە سەنىم-نانىمىنا قاراماستان نيەت بىلدىرگەن ءاربىر ادام كەلە الادى. جاقىن ۋاقىتتا مۇندا باسقا جوبالاردى دا ىسكە قوسۋ جوسپارلانىپ وتىر.

«مەشىت - عيبادات ەتەتىن جەر عانا ەمەس، بۇل رۋحاني جانە مادەني تاربيەنىڭ ناعىز وشاعى. ءدىن بىرىگۋگە، رۋحاني باي تۇلعا بولۋعا ۇندەيدى. سوندىقتان جاڭا جىلدى ءتىل وقىتۋ كۋرستارىنان باستاپ، مۇندا ديپلومى بار مامانداردى شاقىردىق. الداعى ۋاقىتتا بۇل جوبانى جالعاستىرماقپىز. بولاشاقتا ايەلدەرگە ارنالعان تىگىن شەبەرحاناسىن، سپورت سەكسيالارىن اشقىمىز كەلەدى. ادامداردى يسلام نەگىزدەرىنە ۇيرەتۋ، ارينە، باستى باسىمدىق مىندەتىمىز بولىپ قالا بەرەدى»، - دەپ اتاپ ءوتتى يمام - ق م د ب- نىڭ تالدىقورعان ايماعى بويىنشا وكىلى سەرىكحان احماديەۆ.

«يمان» ورتالىق مەشىتىنىڭ باستاماسىن باسقا ءدىن وكىلدەرى دە قولداۋعا دايىن. وسىعان ۇقساس كۋرستار وبلىستاعى ءار مەشىتتە اشىلادى.