حورۆاتيا پرەزيدەنتى بولىپ ايەل ادام سايلاندى

استانا. قازاقپارات - حورۆاتيا ەلىنىڭ قازىرگى پرەزيدەنتى، 57 جاستاعى سوتسيال-دەموكرات يۆو يوسيپوۆيچ جەكسەنبى كۇنى وتكەن مەملەكەت باسشىسىن كەزەكتى سايلاۋدا جەڭىلىسكە ۇشىراپ، ءوزىنىڭ ورىنتاعىن وپپوزيتسيا اتىنان شىققان ۇمىتكەر، 46 جاستاعى كوليندا گرابار-كيتاروۆيچكە ۇسىنۋعا ءماجبۇر بولدى.

مەملەكەتتىك سايلاۋ كوميسسياسىنىڭ جاريالاعان قورىتىندىلارى بويىنشا، گرابار-كيتاروۆيچ جەكسەنبى كۇنى وتكەن سايلاۋدىڭ ەكىنشى كەزەڭىندە 50,43 پايىز داۋىسقا يە بولدى. يوسيپوۆيچكە سايلاۋشىلاردىڭ 49,57 پايىزى داۋىس بەرگەن. ازاماتتاردىڭ سايلاۋعا قاتىسۋى 58,9 پايىزدى قۇرادى.

حورۆاتيا تاريحىندا التىنشى رەت وتكىزىلگەن پرەزيدەنتتىك سايلاۋدا ەرەكشە جاعدايلار ورىن الدى: ۇمىتكەرلەرگە داۋىس بەرۋشىلەر ايىرماسى شامامەن 20 مىڭ داۋىسقا دەيىن جەتتى، ال بيۋللەتەندەردى ساناۋ كەزىندە كوش باسىنداعى ۇمىتكەردىڭ ەسىمى ۇزدىكسىز وزگەرىپ تۇردى.

وسىلايشا، حورۆاتيا ەلى 1991-جىلى ءوز تاۋەلسىزدىگىن العان كەزىنەن بەرگى تاريحىندا العاش رەت ايەل ادام ەل پرەزيدەنتى بولىپ سايلاندى، دەپ حابارلايدى ر ي ا نوۆوستي.