بالالار مۋلتفيلمى زۇلىمدىققا تولى - عالىمدار

استانا. قازاقپارات - لوندونداعى ۋنيۆەرسيتەت كوللەدجىنىڭ ماماندارى جۇرگىزگەن زەرتتەۋ بارىسىندا بالالار مۋلفيلمىنىڭ زۇلىمدىققا، قاتىگەزدىككە تولى ەكەندىگىن انىقتادى.

زەرتتەۋ بارىسىندا بەلگىلى بولعانداي، بالالار مۋلتفيلمىنىڭ كەيىپكەرلەرى ەرەسەكتەرگە ارنالعان فيلم كەيىپكەرلەرىنە قاراعاندا ەكى ەسە ولىمگە دۋشار بولادى ەكەن.

عالىمدار ءبىر جىلدا شىققان فيلمدەر مەن مۋلتفيلمدەردە كورسەتىلگەن زۇلىمدىق ارەكەتتەردى سالىستىرعان. زەرتتەۋگە ەرەسەكتەرگە ارنالعان قورقىنىشتى جانرداعى فيلمدەردى دە پايدالانادى.

بەلگىلى بولعانداي، بالالار مۋلتفيلمىنىڭ كەيىپكەرلەرى ەرەسەكتەرگە ارنالعان فيلم كەيىپكەرلەرىنە قاراعاندا 2,5 ەسە كوپ ولگەن. كەيبىر مۋلتفيلمدەردەگى باستى كەيىپكەرلەردى كەم دەگەندە ءۇش رەت قاساقانا ولتىرگەن، سونداي-اق سول كەيىپكەرلەردىڭ اتا-انالارى دا قازا تاپقان. بۇل بالانىڭ پسيحيكالىق جۇيەسىنە كەرى اسەرىن تيگىزەتىنى بەلگىلى.

بۇعان دەيىن، پسيحولوگ ماماندار مۋلتفيلمدەگى كەيىپكەر سۇيكىمسىز، كورىكسىز بولىپ، قيىندىقتان قاشسا، وڭاي جولمەن، ەڭبەكسىز نەمەسە الداۋ ارقىلى تابىسقا جەتۋدى كوكسەسە، ونداي مۋلتفيلمدەردى بالالارعا كورسەتۋدەن اۋلاق بولۋ كەرەكتىگىن ايتقان بولاتىن، دەپ جازادى شەتەلدىك ب ا ق.