الماتىدا شاڭعى سپورتىنان الەم چەمپيوناتتارى وتەدى
جاسوسپىرىمدەر اراسىندا وتەتىن الەم چەمپيوناتىنىڭ باعدارلاماسىنا شاڭعى سپورتىنىڭ شاڭعى جارىستارى، ترامپليننەن سەكىرۋ جانە شاڭعى قوسسايىسى سىندى تۇرلەرى ەنگەن. ولارعا قاتىساتىن جاسوسپىرىمدەر 23 جاسقا دەيىنگىلەر اراسىندا وتەتىن الەم چەمپيوناتىنا قاتىسا المايدى.
«الماتى قالاسىنىڭ حالىقارالىق سپورت جوبالارى ديرەكسياسى» مەملەكەتتىك قورى باسپا ءسوز قىزمەتىنىڭ حابارلاۋىنشا، قازىرگى تاڭدا 36 ەلدەن 500 دەن استام شاڭعىشى چەمپيوناتقا قاتىساتىندارىن قۋاتتاعان. اتالمىش جارىستاردا قازاقستان قۇراما كومانداسى ساپىندا 26 شاڭعىشى ەل نامىسىن قورعايتىن بولادى.
ايتا كەتەلىك، بۇل چەمپيوناتتار الماتىدا تۇڭعىش رەت وتكىزىلمەك. ۇيىمداستىرۋشىلاردىڭ اتاپ وتكەنىندەي، مۇنداي حالىقارالىق دەڭگەيدەگى سپورتتىق شارالاردى وتكىزۋ - جاستاردى قىسقى سپورت تۇرلەرىمەن اينالىسۋعا كوپتەپ تارتۋعا سەپتىگىن تيگىزەدى. سونىمەن قاتار، ولار الماتىدا 2017 - جىلى وتەتىن بۇكىل الەمدىك قىسقى ۋنيۆەرسيادا ويىندارىنا دايىندالۋدا ماڭىزدى قادام بولماق.
بۇل شارالاردى الماتى قالاسىنىڭ اكىمدىگى، الماتى قالاسىنىڭ حالىقارالىق سپورت جوبالارى ديرەكسياسى، قازاقستاننىڭ شاڭعى سپورتى تۇرلەرى بويىنشا قاۋىمداستىعى، سونداي- اق، قازاقستاننىڭ شاڭعىمەن تارامپليننەن سەكىرۋ جانە قازاقستان رەسپۋبليكاسىنىڭ شاڭعى جارىستارى ۇلتتىق فەدەراتسيالارى ۇيىمداستىرعالى وتىر.
