شري-لانكادا پرەزيدەنتتىك سايلاۋ باستالدى

استانا. قازاقپارات - بۇگىن، بەيسەنبىدە شري-لانكادا پرەزيدەنتتىك سايلاۋعا داۋىس بەرۋ باستالدى. فرانس پرەسس اگەنتتىگىنىڭ حابارلاۋىنشا، سايلاۋ ۋچاسكەلەرى جەرگىلىكتى ۋاقىت بويىنشا ساعات 07:00 دە اشىلدى، 16:00 دە جابىلادى.

كۇتىلىپ وتىرعانداي، داۋىس بەرۋگە ەلدىڭ شامامەن 15 ميلليون ازاماتى قاتىسا الادى، دەپ حابارلايدى DPA اگەنتتىگىنەن.

بۇعان دەيىن ەلدىڭ قازىرگى باسشىسى ماحيندا رادجاپاكسە ءۇشىنشى رەت داۋىسقا ءتۇسۋ نيەتىن بىلدىرگەن بولاتىن. سونداي-اق پرەزيدەنتتىك بايگەگە قاتىسۋعا نيەتى بارلىعىن دەنساۋلىق ساقتاۋ ءمينيسترى مايتريپالا سيريسەنا دا ءمالىم ەتتى.

رادجاپاكسە 2005-جىلعى سايلاۋدا جەڭىسكە جەتكەن، الايدا ەكىنشى التى جىلدىق مەرزىمگە قايتا سايلاۋدان كەيىن ول كونستيتۋتسياعا وزگەرىستەر ەنگىزىپ، ەل پرەزيدەنتى ءۇشىن ەكى مەرزىمگە شەكتەۋدى الىپ تاستادى. باستاپقىدا پرەزيدەنتتىك سايلاۋ 2017-جىلى ءوتۋى ءتيىس بولاتىن.