ن. نازاربايەۆ فرانسيا حالقىنا كوڭىل ايتتى

استانا. قازاقپارات - ەلباسى «شارلي ەبدو» باسىلىمى رەداكسياسىنا قاتىستى جاسالعان تەررورلىق ارەكەتكە بايلانىستى فرانسۋز رەسپۋبليكاسى پرەزيدەنتى فرانسۋا وللاندقا كوڭىل ايتۋ جەدەل حاتىن جولدادى، دەپ حابارلادى اقوردانىڭ باسپا ءسوز قىزمەتىنەن.

جەدەل حاتتا تەررورلىق ارەكەت سالدارىنان فرانسۋز ازاماتتارىنىڭ قازا تاپقانى تۋرالى سۋىت حاباردى مەملەكەت باسشىسى ۇلكەن كۇيزەلىسپەن قابىلداعانى جونىندە ايتىلعان.

«بۇگىنگى كۇنى تەرروريزمنىڭ ەتەك الۋى بارلىق مەملەكەتتەر ءۇشىن ورتاق قاۋىپ-قاتەرگە اينالىپ وتىر. قازاقستان ءوز تاراپىنان حالىقارالىق قاۋىپسىزدىككە قاتەر تۋعىزاتىن لاڭكەستىك پەن ەكسترەميزمنىڭ كەز كەلگەن ءتۇرىن ايىپتايدى»، دەلىنگەن جەدەل حاتتا.

نۇرسۇلتان نازاربايەۆ قازاقستان حالقىنىڭ جانە جەكە ءوزىنىڭ اتىنان وقيعا قۇرباندارىنىڭ وتباسىلارى مەن تۋعان-تۋىستارىنا، سونداي-اق بۇكىل فرانسيا حالقىنا شىن نيەتپەن كوڭىل ايتتى.