ەفيرگە «قازاقستان داۋىسىنىڭ» جاڭا كەزەڭى شىعادى
بۇل كەزەڭ بويىنشا قازاقستاندىقتار تىكەلەي ەفيردە SMS داۋىس بەرۋ ارقىلى جوبانىڭ جەڭىمپازىن انىقتاۋعا قاتىسادى.
ەستەرىڭىزدە بولسا، العاش بولىپ ساحناعا كوتەرىلگەن ەرنۇر قابىلدايەۆ پەن نۇرسۇلتان ەسەنقۇلدىڭ ۇزدىگىن تاڭداۋ ءمادينا ءسادۋاقاسوۆاعا قيىن بولدى. كەڭەسشىسى گاۋھار قاسپاقوۆانىڭ كومەگىمەن تالىمگەر ەرنۇردى جوبادا قالدىردى.
سونداي-اق، ءمادينانىڭ توبىنداعى ەكىنشى جۇپ ازامات جۇماعاليەۆ پەن سانا مۇقانوۆانىڭ اراسىنان سانا ۇزدىك شىقتى.
تالىمگەر نۇرلان الباننىڭ توبىنان ءادىلحان ماكين مەن نۇرمان ارىستانوۆ، ەربوتا ۇزاقبايەۆ پەن ءداستۇر اسىلحان قاتار شىقتى.
العاشقى ماۋسىمداعى ۇمىتكەر ءادىلحان ماكين بۇل جولى تاعى دا ءسۇرىندى. ال، قارسىلاسىنان جەڭىلگەن ءداستۇر اسىلحاندى الماس كىشكەنبايەۆتىڭ توبىنا قوستى.
مەدەۋ ارىنبايەۆتىڭ توبىنان جاندوس رايىمبەكوۆ پەن فاريزا جولامانوۆا كەلەسى كەزەڭگە ءوتتى. ال، ولاردىڭ قارسىلاستارى ساعىن ءتۇسىپوۆ پەن زارينا ءامىرحانوۆانىڭ جولى بولمادى.
الماس كىشكەنبايەۆتىڭ توبىنان ءبىر عانا جۇپ - اسەم ماحامبەتوۆا مەن اينۇر ابديەۆا ونەر كورسەتتى. كەلەسى كەزەڭدە اينۇر ابديەۆا باق سىنايدى.
جالپى، «قازاقستان داۋىسى» جوباسى ءۇش كەزەڭنەن تۇرادى. ءبىرىنشى كەزەڭ - بارلىق قاتىسۋشىلاردى تىڭداۋ ارقىلى تالىمگەرلەردىڭ ءارقايسىسى ءتورت توپ قۇرادى. ەكىنشى كەزەڭدە ۇمىتكەرلەر اراسىندا جۇپتىق سايىس وتكىزىلەدى. ءۇشىنشى كەزەڭدە جەڭىمپازداردى حالىق SMS داۋىس بەرۋ ارقىلى انىقتايتىن بولادى.
baq.kz
